Çin bayraqlı “Yuah Hai 9” yük gəmisinin üst quruluşunda Qionqzhou boğazında yanğın çıxıb.
“Seanews.az” xəbər verir ki, hadisə dünən səhər saatlarında gəmi Qionqzhoudan Haikouya, Hainan adasına gedərkən baş verib.
Yardım üçün hadisə yerinə bir neçə gəmi göndərilib, gəmidə olan heyət evakuasiya edilib. Xüsusi sistemlərin aktivləşdirilməsi ilə yanğın nəzarətə alınıb.
“Azərbaycan Xəzər Dəniz Gəmiçiliyi” Qapalı Səhmdar Cəmiyyəti və Cəmiyyətin tərkibinə daxil olan strukturların aparat işçiləri arasında keçirilən mini-futbol turnirinin ilk yarımfinal oyunu keçirilib.
Yarımfinal mərhələsinin ilk cavab görüşü Xəzər Dəniz Neft Donanması və “Zığ” Gəmi Təmiri və Tikintisi Zavodu arasında baş tutub.
Şəfa stadionunda keçirilən qarşılaşmada 7-2 hesabı ilə Xəzər Dəniz Neft Donanmasının komandası qalib gələrək finala vəsiqə qazanıb.
Digər yarımfinal oyunu “Azərbaycan Xəzər Dəniz Gəmiçiliyi” QSC və “Bibiheybət” Gəmi Təmiri Zavodunun arasında 20 oktyabr saat 13:00-da Azfarın stadionunda keçiriləcək.
Qeyd edək ki, yarışın keçirilməsində məqsəd dənizçilərin asudə vaxtını səmərəli təşkil etmək, onların fiziki sağlamlığını möhkəmləndirmək, idmana maraqlarını daha da artırmaqdan ibarətdir.
Oktyabrın 18-i Azərbaycanın Dövlət Müstəqilliyi Günüdür.
27 il əvvəl Azərbaycan Respublikası Ali Soveti Dövlət müstəqilliyi haqqında Konstitusiya Aktını qəbul etdi. Oktyabrın 8-də işə başlayan növbədənkənar sessiya məsələni 4 gün müzakirə etsə də, qərar verməyi bir həftə sonraya saxladı. Nəhayət, 1991-ci il oktyabrın 18-də Ali Sovetin sessiyasında tarixi sənəd qəbul edildi.
Müstəqilliyinin ilk illərində özünün ağır günlərini yaşayan Azərbaycan xalqı qətiyyətli iradə nümayiş etdirərək gələcək taleyinə sahib çıxmağı bacardı. 1993-cü ildə xalqın təkidli tələbi ilə Azərbaycanda ikinci dəfə hakimiyyətə qayıdan ulu öndər Heydər Əliyev ölkəmizin müstəqilliyini əbədi və dönməz etdi. Dövlət müstəqilliyi haqqında Konstitusiya Aktı 1991-ci il oktyabrın 18-də qəbul edilsə də, əslində Azərbaycan özünün əsl müstəqilliyini ümummilli lider Heydər Əliyevin hakimiyyətə qayıdışından sonra əldə etdi. Məhz Ümummilli Liderin zəngin siyasi təcrübəsi, yüksək idarəçilik bacarığı, Vətənə olan tükənməz sevgisi Azərbaycanın dövlət müstəqilliyini təhlükədən qurtardı. Ulu Öndər ölkədə xaos və anarxiyanı, cəmiyyətdə hökm sürən iqtisadi, siyasi və mənəvi psixoloji gərginliyi aradan qaldırdı. Müstəqil Azərbaycan Respublikası möhkəm əsaslar üzərində yeni inkişaf xəttini tutdu. Azərbaycanı müsəlman Şərqində ilk demokratik respublika olan Xalq Cümhuriyyətinin varisi elan edən ümummilli lider Heydər Əliyev müstəqilliyi qorumaq onu əldə etməkdən qat-qat çətindir məntiqi ilə nəhəng dövlət quruculuğu işlərinə başladı. Ulu Öndərin yorulmaz səyləri nəticəsində qısa müddətdə Azərbaycanın səsi ən nüfuzlu beynəlxalq təşkilatların kürsüsündən gəldi. Müstəqilliyin əvəzsiz bir nemət olduğunu və xalqın tarixi taleyində çox önəmli rol oynadığını böyük qürur hissi ilə bəyan edən Heydər Əliyev Azərbaycanın müstəqilliyini əbədi və dönməz etdi. Əsl müstəqillik isə öz sərvətlərinin tam sahibi olmaqdır. 1994-cü il sentyabrın 20-də Heydər Əliyevin müəllifi olduğu nəhəng neft müqaviləsi – “Əsrin kontraktı” imzalandı. Bununla da Azərbaycan ilk dəfə olaraq öz sərvətlərinin sahibi kimi çıxış etdi. Dünyanın aparıcı dövlətlərinin ən qabaqcıl şirkətlərinin bu kontraktda iştirakı isə ölkəmizin regionda əhəmiyyətini və nüfuzunu artırdı. Azərbaycan iri regional layihələr, Avropa və bütövlükdə dünya enerji təhlükəsizliyi sisteminə qoşuldu. 1993-cü ildən başlayaraq dövlət müstəqilliyinin möhkəmləndirilməsi istiqamətində görülən işlər və atılan məqsədyönlü addımlar Azərbaycanın bugünkü uğurları üçün ən etibarlı təməl oldu. Bir sözlə, əgər Azərbaycanın müstəqilliyi tarixi zərurətdən irəli gələn hadisə idisə, bu müstəqilliyin əbədiliyi və dönməzliyi ümummilli lider Heydər Əliyevin adı və bağlıdır.
Ulu Öndərin müstəqilliyimizin qorunub saxlanması və möhkəmləndirilməsi istiqamətində yorulmaz səyləri bu gün onun layiqli davamçısı Prezident İlham Əliyev tərəfindən davam etdirilir. Ümummilli Liderin çoxşaxəli fəaliyyətinin nəticələrinə arxalanaraq, Prezident İlham Əliyevin rəhbərliyi ilə Azərbaycan siyasi, iqtisadi, sosial və hərbi sahələrdə nəzərəçarpan tərəqqi əldə edib. Azərbaycan yerləşdiyi bölgədə baş verən strateji, siyasi və iqtisadi proseslərin gedişinə təsir göstərməyə qadir olan ölkəyə çevrilib. Azərbaycan özünün siyasi və iqtisadi qüdrəti, strateji mövqeyi, zəngin təbii ehtiyatlarından xarici siyasət prioritetlərinin təmin olunmasında məharətlə istifadə edir. Milli maraqlara uyğun olaraq beynəlxalq birliyin əksər üzvləri ilə qarşılıqlı faydalı əməkdaşlıq həyata keçirilir. Dövlətimizin başçısının həyata keçirdiyi uğurlu inkişaf strategiyası nəticəsində ölkə iqtisadiyyatı özünün inkişaf sürətinə görə dünyada ən yüksək yerlərdə durur.
Beləliklə, vaxtilə ulu öndər Heydər Əliyev tərəfindən qorunub saxlanılan müstəqilliyimiz bu gün Prezident İlham Əliyevin rəhbərliyi ilə daha da möhkəmləndirilir və onun əbədiliyi təmin edilir. Bütün bunlar bir daha deməyə əsas verir ki, Azərbaycanın müstəqilliyi əbədi və dönməzdir.
Azərtac
Zadar Xorvatiyanın ən qədim və gözəl şəhərlərindən biridir. Paytaxt Zaqrebdən Zadara təxminən 3 saata çatmaq (285 kilometr) mümkündür.
Adriatik dənizinin sahilində, Dalmasiya vilayətində yerləşən Zadar kurort şəhəri çimərlik istirahəti üçün geniş imkanları ilə məşhurdur. Bununla belə, turistlər burada bir an belə darıxmır, bu yerlərin tarixi keçmişini tədqiq edirlər.
Zadarda müasir əyləncə həvəskarları da diqqətdən kənarda qalmayıb. Çünki, burada onları dünyada yeganə olan dənizin sahilində işıq şousu gözləyir. Zadarlılar məhz günəşin ən gözəl qürubunun da burada olduğunu iddia edirlər!
İşıq şousu ilə videodan tanış ola bilərsiniz.
Bu vaxtadək “Neft Daşları” yatağından 175 milyon tonadək neft-kondensat, 79 milyon kubmetrə yaxın təbii qaz çıxarılıb.
Bu barədə SOCAR məlumat yayıb.
Bildirilib ki, indiyədək “Neft Daşları” yatağı üzrə qazılan 1916 quyudan 175 milyon tona yaxın neft-kondensat, 79 milyon kubmetrədək qaz hasil edilib.
“Dəniz” qəzetinin Azərbaycan Xəzər Dəniz Gəmiçiliyinin 160 illiyinə həsr olunmuş xüsusi buraxılışı çapdan çıxıb.
Qəzetin PDF variantını təqdim edirik: DƏNİZ- 17 oktyabr 2018-ci il
Maraqlı yazıları və yüksək poliqrafik tərtibatı ilə seçilən 32 səhifəlik xüsusi buraxılış Ümummilli lider Heydər Əliyevin və dövlət başçımız İlham Əliyevin həm də dənizçilərin bugünkü uğurlarına inam və əminliyi ifadə edən deyimləri ilə açılır.
“Yolunuz açıq olsun, səfərləriniz uğurlu!” adlı təbrikdə dənizçi peşəsinin şərəfli olduğu qədər də çətin və məsuliyyətli olduğunu vurğulayan “Azərbaycan Xəzər Dəniz Gəmiçiliyi” QSC-nin sədri Rauf Vəliyev yalnız bu peşəyə ürəkdən bağlanan cəsur və fədakar adamların dənizin bitməyən sınaqlarından üzüağ çıxmağı bacardığını diqqətə çatdırır. Xalqımızın dalğalar qoynunu fəaliyyət meydanı seçən dənizçilərə böyük hörmət və ehtiramı da xeyli dərəcədə onların bu fədakarlığından qaynaqlanır.
Gəmiçiliyin çoxminli kollektivi yubileyi bütün sahələrdə qazandığı yüksək göstəricilərlə qarşılayır. Dövlətimizin dəstəyi ilə donanmanın gəmiqayırmanın son nailiyyətləri əsasında inşa olunan yeni gəmilərlə möhkəmləndirilməsi də, Xəzərdə Gəmiçiliyin öncül mövqeyinin qorunub saxlanılması da, müstəqil respublikamızın üçrəngli bayrağı altında yad sularda üzən gəmilərimizin sayının artırılması hesabına donanmamızın Xəzərdənkənar fəaliyyətinin genişləndirilməsi də… dənizçilərin yubiley sevincinə sevinc qatan faktlardır.
Buraxılışda şanlı tarixə və ənənələrə malik Azərbaycan gəmiçiliyinin 160 ildə keçdiyi şərəfli yola ətraflı işıq salınır. “Qafqaz və Merkuri”dən başlanan yol” yazısından məlum olur ki, 1858-ci ildə yaradılan və Azərbaycan Xəzər Dəniz Gəmiçiliyinin sələfi sayılan “Qafqaz və Merkuri” Səhmdar Cəmiyyəti Xəzərdə çox ilklərə imza atıb. Dünyada ilk neftdaşıyan “Aleksandr” barjı 1873-cü ildə Xəzərdə istismar edilib. 1878-ci ildə inşa edilən ilk tanker “Zərdüşt” də Gəmiçiliyin sələfinə məxsus olub. İlk daxiliyanma mühərrikli “Vandal” (1903), ilk reversivli iki mühərriklə çalışan “Delo” (1908) gəmilərində üzmək də Xəzər dənizçilərinin bəxtinə düşüb. Gəmiçiliyimizin o vaxtdan başlayan şərəfli yolu 160 ildir davam edir. 160 ildir dənizçilərimiz dalğalar qoynunda pozulmaz naxışlar salır, fədakar əməkləri ilə hünər dastanı yazırlar.
Gəmiçiliyin Azərbaycan Xalq Cümhuriyyəti dövründəki fəaliyyəti ilə maraqlananlar yəqin ki, “Donanma 1918-1920-ci illərdə” yazısını diqqətdən qaçırmazlar.
“Əgər Bakı nefti olmasaydı” yazısında Azərbaycan neftinin alman faşizmi üzərində Qələbənin təmin olunmasında əvəzsiz rolundan, qəhrəman neftçilərimizin hasil etdikləri “qara qızıl”ın dənizçilərimizin düşmən təyyarələrinin bombardmanları altında belə fasiləsiz daşıdıqlarından bəhs edilir. Azərbaycan Xəzər Dəniz Gəmiçiliyinin 1534 işçisinin orden və medallarla təltif olunması faktı da dənizçilərimizin Böyük Vətən müharibəsi illərindəki fədakarlığı barədə çox şey deyir.
Dənizçilərimizin xalqımızın milli azadlıq hərəkatında, qanlı 20 Yanvar hadisələrində, Qarabağ savaşında göstərdikləri şücaət də unudulan deyil.
Kollektivin Böyük Vətən müharibəsindən sonrakı fəaliyyətinə işıq salan “Azərbaycan Xəzər Dəniz Gəmiçiliyi 1946-1970-ci illərdə” yazısında da oxucular onları maraqlandıran bir çox suallara cavab tapa bilərlər.
“Azərbaycan Xəzər Dəniz Gəmiçiliyi” QSC-nin sədri Rauf Vəliyevin “Ulu öndər Heydər Əliyevin Gəmiçiliyin qorunub saxlanılmasında və inkişafında misilsiz xidmətləri” yazısını tədqiqatçılar üçün dəyərli mənbə də saymaq olar. Yazıda belə bir əminlik ifadə olunur ki, dənizçilər bugün Azərbaycan Xəzər Dəniz Gəmiçiliyini, xüsusən onun əsasını təşkil edən nəqliyyat və neft donanmalarını Ulu öndərin yadigarı hesab etməkdə haqlıdırlar. Ümummilli liderin iqtisadi siyasətində gəmiçilik həmişə xüsusi yer tutub. Təsadüfi deyil ki, Azərbaycan Xəzər Dəniz Gəmiçiliyinin tarixində Heydər Əliyevin ölkəmizə rəhbərlik etdiyi və SSRİ-nin ali rəhbərliyində çalışdığı illər donanmaların zənginləşməsi və sürətli inkişafı dövrü hesab edilir. Məhz, həmin dövrlərdə Gəmiçilik üçün dünyanın ayrı-ayrı ölkələrində inşa olunmuş 450-yə yaxın müxtəlif təyinatlı gəmi alınıb. Qədirbilən dənizçilər də Ulu öndərin Gəmiçiliyin inkişafında, Azərbaycanın çox böyük sərvəti hesab etdiyi donanmasının qorunub saxlanılmasında əvəzsiz xidmətlərini heç vaxt unutmurlar. Və iftixarla deyirlər ki, təkcə ölkəmizin dəniz nəqliyyatı üçün gördüyü işlər dahi Heydər Əliyevin tarixdə əbədi qalması üçün yetərlidir.
Dənizçilər Ulu öndərin siyasi kursunu böyük məharətlə davam etdirən möhtərəm Prezidentimiz İlham Əliyevdən də daim diqqət və qayğı görür və bu qayğıya əməli işləri ilə cavab verməyə çalışırlar. Məhz dövlət başçımızın dəstəyi ilə Gəmiçilik hər cür yükləri daşımağa və neft-qaz istehsalı ilə bağlı bütün dəniz nəqliyyatı xidmətləri göstərməyə qadir unikal şirkətə çevrilib. 2013-cü ilin 22 oktyabrında imzaladığı Sərəncamla dəniz gəmiçiliyi sahəsində yerli və beynəlxalq daşımaların artırılması, ölkənin rəqabət qabiliyyətinin və tranzit potensialının gücləndirilməsi məqsədilə respublikada mövcud olan iki böyük donanma – Azərbaycan Dövlət Xəzər Dəniz Gəmiçiliyi və Azərbaycan Respublikası Dövlət Neft Şirkətinin Xəzər Dəniz Neft Donanması birləşdirilərək yenidən təşkil edilməklə “Azərbaycan Xəzər Dəniz Gəmiçiliyi” Qapalı Səhmdar Cəmiyyəti yaradılıb. Azərbaycanın dəniz nəqliyyatının yüksək inkişafı, Gəmiçiliyin dünyanın ən qabaqcıl, beynəlxalq standartlara tam cavab verən şirkətə çevrilməsi üçün hər cür dəstək göstərilir. Təkcə son beş ildə donanması 20-dən çox yeni gəmi ilə möhkəmləndirilən Gəmiçilik üçün hazırda Bakı Gəmiqayırma Zavodunda daha dörd gəmi tikilir.
Yeni gəmilərin istismara verilməsi dənizçilər üçün əlamətdar hadisələrdəndir. Belə tədbirlərdə dövlət başçımızın iştirakı isə onları daha unudulmaz, daha yaddaqalan edir. “Dənizçilərimiz üçün min aya dəyən günlər” rubrikası altında təqdim olunan yazılar möhtərəm prezidentimizin yeni gəmilərin istismara verilməsi mərasimlərində iştirakının Gəmiçiliyin çoxminli kollektivi üçün böyük bayrama çevrildiyindən bəhs edir.
2017-ci il sentyabrın 6-da Bakı Gəmiqayırma Zavodunda “Şahdəniz-2” layihəsi çərçivəsində inşa edilən “Xankəndi” sualtı tikinti gəmisinin təqdimat mərasimində çıxışı zamanı Azərbaycan Respublikasının Prezidenti İlham Əliyevin dilində səslənən “Xəzər Dəniz Gəmiçiliyinin fəaliyyətini çox yüksək qiymətləndirirəm. Gəmiçiliyin fəaliyyəti beynəlxalq standartlara cavab verir. Gəmiçilik artıq gəlirlə işləyir, büdcəmizə böyük vergi ödəyir” sözləri isə dənizçilərə hədsiz sevinc bəxş etməklə yanaşı, həm də cavabdeh olduqları işlər üçün məsuliyyət hissini qat-qat artırır.
İctimaiyyətlə əlaqələr departamentinin mütəxəssisi Sevda Abdullayevanın “Azərbaycan Xəzər Dəniz Gəmiçiliyi” QSC-nin yaradılması ilə yeni zəfərlərə doğru” məqaləsində Gəmiçiliyin qabaqcıl, rəqabətədavamlı şirkətə çevrilməsi sahəsində son beş ildə əldə olunan nailiyyətlərdən söhbət açılır. Müəllif bildirir ki, dor ağacında müstəqil Azərbaycanın üçrəngli bayrağı dalğalanan gəmilərlə təkcə yaxın-uzaq sularda dinc yüklər daşınmır. Dənizçilərimizin neft-qaz istehsalı üçün zəruri dəniz nəqliyyatı xidmətləri sahəsində də böyük səriştələri var. Xəzər Dəniz Neft Donanmasının dənizçiləri Xəzər şelfində, dənizin Azərbaycan sektorunda qiymətli enerji daşıyıcıları hasil edilən ilk gündən neftçilərlə çiyin-çiyinə çalışırlar. Xəzərdə bünövrəsi Ulu öndər Heydər Əliyevin neft strategiyası ilə qoyulan, “Əsrin müqaviləsi” ilə pərvəriş tapan və dövlət başçımız cənab İlham Əliyevin parlaq zəkası ilə naxışlanan bütün nəhəng layihələrin gerçəkləşdirilməsində dənizçilər çiyinlərinə düşən vəzifələrin öhdəsindən məharətlə gəlirlər. Bunlarla yanaşı, Azərbaycan Xəzər Dəniz Gəmiçiliyi həm də, yüksək keyfiyyətli gəmi təmiri, logistika, agentlik, təhsil və təlim xidmətləri… həyata keçirir.
Oxucular bu sayda Gəmiçiliyin və onun struktur bölmələrinin fəaliyyətini əks etdirən yazılarla da tanış ola bilərlər. “Zavodlarımızda bütün mürəkkəb təmir əməliyyatlarının öhdəsindən məharətlə gəlirlər” məqaləsi Gəmiçiliyin gəmi təmiri müəssisələrinin fəaliyyətindən, “Bərə komplekslərinin layihələndirilməsinin ən çox etibar edildiyi “Xəzərdənizlayihə ETİ” yazısı Xəzər Dəniz Layihə Elmi-Tədqiqat İnstitutunun kollektivinin uğurlarından, “Dənizdən güclü olmağı öyrədən təhsil ocağı” məqaləsi Azərbaycan Dövlət Dəniz Akademiyasında gələcəyin dənizçilərinin yüksəkixtisaslı mütəxəssislər kimi yetişmələri üçün yaradılan şəraitdən bəhs edir.
160 illiyini qeyd edən Azərbaycan Xəzər Dəniz Gəmiçiliyinin tarixin bütün sınaqlarından uğurla çıxmasının, müxtəlif dövrlərin sarsıntılarına sinə gərməsinin sirrini ilk növbədə taleyini Gəmiçiliksiz təsəvvür etməyən dənizçilərin fədakarlığı və sədaqətində axtarmaq lazımdır. “Unutsaq, unudularıq” rubrikası altında oxucuların diqqətinə təqdim edilən yazılarda belə şəxslər barədə dolğun məlumat verilir.
Xüsusi buraxılışda digər yazılarla yanaşı, Nəqliyyat, Rabitə və Yüksək Texnologiyalar Nazirliyi yanında Dövlət Dəniz Agentliyinin direktoru Qüdrət Qurbanov, SOCAR-ın prezidenti Rövnəq Abdullayev, BP-nin Azərbaycan-Gürcüstan-Türkiyə üzrə regional prezidenti Qəri Counz, Amerika Gəmiçilik Bürosunun Türkiyə, Azərbaycan və Xəzər dənizi regionu üzrə direktoru Seyfəttin Tatlı, “Rusiya Dəniz Registri Azərbaycanda” ASC-nin sədri Şaban Quliyev, Xəzər Dəniz Mühəndisliyi Bürosunun Baş direktoru, texnika elmlər doktoru, professor Gennadi Yeqorov, “Bakı Gəmiqayırma Zavodu” MMC-nin Baş Meneceri İmanverdi Həsənov, “Caspian Marine Services Limited” şirkətinin direktoru Zamiq İsmayılov, “DNVGL AS” şirkətinin Azərbaycandakı Nümayəndəliyinin rəhbəri Rəsul Hüseynov, akademik, Milli Məclisin İqtisadi siyasət,sənaye və sahibkarlıq komitəsinin sədri, Azərbaycan İqtisadçılar İttifaqının sədri, Beynəlxalq İqtisadçılar İttifaqının vitse-prezidenti Ziyad Səmədzadə, Milli Məclisin deputatları Aydın Mirzəzadə və Qənirə Paşayeva, Xalq artisti, Əməkdar incəsənət xadimi Faiq Sücəddinov, «İki sahil» qəzetinin Baş redaktoru, Əməkdar jurnalist Vüqar Rəhimzadənin Gəmiçiliyin 160 illik yubileyi münasibətilə dənizçilərə təbrikləri də yer alıb.
Geniş spektr elektron avadanlıqlar istehsalı ilə məşğul olan “İntel” və daha çox avtomobilləri ilə tanınan “Rolls-Royce” kapitansız gəmi hazırlanması üçün bir araya gəlir.
“Seanews.az” xəbər verir ki, bununla bağlı hər iki şirkət rəsmi açıqlama yayıb.
Açıqlamada bildirilir ki, ortaq iş birliyi nəticəsində 2025-ci ilədək ilk avtonom yük gəmisi istehsal olunacaq. Gəminin tikilməsi zamanı “Intel”in avtonom sürücülük texnologiyasından istifadə ediləcək.
“Rolls-Royce” ağıllı gəmilərlə dəniz daşımalarını daha təhlükəsiz hala gətirmək niyyətindədir.
Cari ilin yanvar-sentyabr aylarında Azərbaycanda 28 milyon 994,7 min ton xam neft (qaz kondensatı daxil olmaqla) və 22 milyard 246,7 milyon kubmetr təbii qaz hasil olunub. Həmin həcmdən 13 milyard 833,8 milyon kubmetr əmtəəlik təbii qaz alınıb.
Dövlət Statistika Komitəsindən bildirilib ki, 9 ayda mədənçıxarma sənayesində istehsalın ümumi dəyəri 26 milyard manat olmaqla əvvəlki ilin yanvar-sentyabr aylarına nisbətən 0,2 faiz artıb.
Ölkədə neft istehsalı 0,7 faiz, qaz hasilatı isə 2,4 faiz çoxalıb.
Yüklə dolu İtaliyaya gələn ümumi yük gəmisi “Maestro” limana yan alarkən qarışıq vəziyyət yaranıb. Belə ki, gəmi limanda 7 qayıq və yaxta ilə toqquşub.
“Seanews.az” xəbər verir ki, qayıqlardan ikisi batıb, üç nəfər yüngül xəsarət alıb, körpüyə ziyan dəyib. “Maestro” gəmisinə isə zərər dəyib-dəymədiyi barədə hələlik məlumat yoxdur.
Qeyd edək ki, Antiqua bayrağı altında üzən gəmi Litvaya məxsusdur.
Norveçin Ostfold əyalətində arxeoloqlar xüsusi radarlar vasitəsi ilə vikinqlərin məzarlığını və yarım metr dərinlikdə gömülmüş, uzunluğu 20 metrdən çox olan bir gəmi aşkar ediblər.
Tədqiqatçıların sözlərinə görə, gəminin aşağı hissəsi zədələnməyib. Alimlərin fikrincə, bu gəmi 1000 ildən çox bundan əvvəl torpaq altında qalıb.
Məzarlıq kənd təsərrüfatı rayonunda tapılıb. Arxeoloqlar uzun müddət belə hesab edirdilər ki, yaxınlıqdakı ərazidə qazıntı işləri aparmağın mənası yoxdur, çünki yerli fermerlər XIX əsrin axırlarından bu əraziləri şumlayarkən tarixi tapıntıları məhv ediblər. Lakin bu ilin baharında yerli məmurlar Norveç Mədəni İrs İnstitutunun alimlərindən torpağa nüfuz edən güclü radar qurğusundan istifadə etməklə bu tarlaların müayinə olunmasını xahiş ediblər və nəticədə belə bir tapıntı olub.
Hələlik alimlər aşkar edilmiş gəminin qazılıb çıxarılmasını planlaşdırmırlar.
