BP gələn il Xəzərdə yeni kəşfiyyat quyusunun planlaşdırılmasına start verə bilər

01.08.2019

BP şirkəti Xəzərin Azərbaycan sektorunda yerləşən D230 perspektiv bloku üçün ilk kəşfiyyat quyusunun planlaşdırılmasına 2020-ci ildə başlaya bilər.

BP-dən verilən məlumata görə, D230 bloku üzrə 2019-cu ilin dördüncü rübündə 3-ölçülü seysmik tədqiqat aparılması planlaşdırılır.

“Əldə edilmiş nəticələrdən asılı olaraq, ilk kəşfiyyat quyusunun planlaşdırılmasına 2020-ci ildə başlanacaq”, - deyə şirkətin məlumatında qeyd edilib.

D230 strukturu kifayət qədər böyük bir ərazini əhatə edir və orada gələcəkdə kəşfiyyat quyularının harada qazılacağı çox əhəmiyyətlidir. Ən çox da bu struktur ona görə maraqlıdır ki, orada potensial neft ehtiyatları nəzərdə tutulur.

Qeyd edək ki, BP və SOCAR arasında Xəzərin Azərbaycan sektorunda yerləşən Şimal Abşeron hövzəsində D230 saylı blok daxilindəki potensial perspektivli strukturlarda birgə kəşfiyyat işlərinin aparılması üçün 2018-ci ilin aprel ayında Hasilatın Pay Bölgüsü Haqqında Saziş (HPBS) imzalanıb. Saziş 2018-ci ilin oktyabrında Azərbaycanın parlamenti tərəfindən ratifikasiya edilib.

Apa

© Materiallardan istifadə edərkən hiperlinklə istinad olunmalıdır