Qlobal gəmi donanmaları üçün hibrid LEO peyk rabitəsi xidməti istifadəyə verilib
"Marlink" şirkəti “Starlink” və “Eutelsat OneWeb” kimi bir neçə aşağı orbitli (LEO) peyk şəbəkəsini vahid platformada birləşdirən “Sealink Multi-LEO” hibrid rabitə həllini təqdim edib.
“Seanews.az” xəbər verir ki, bu yeni xidmət müxtəlif peyk şəbəkələrini tək bir idarəetmə mərkəzində cəmləşdirərək gəmilər üçün daha stabil internet təmin edir. Sistem avtomatik olaraq performans və əhatə dairəsinə görə ən yaxşı şəbəkəni seçir. Bu, hətta coğrafi məhdudiyyətlər və ya geosiyasi risklər olan zonalarda fasiləsiz rabitə deməkdir.
Vahid aylıq abunə modeli ilə işləyən xidmət həm fərdi gəmilər, həm də bütün donanma üçün tətbiq edilə bilər. Şirkətlər internet paketlərini (500 QB-dan 10 TB-a qədər) gəmilər arasında paylaşımlı şəkildə istifadə edə bilər.
"Marlink"in dənizçilik üzrə prezidenti Tore Morten Olsen bildirib ki, bu həll dənizdə proqnozlaşdırıla bilən, sürətli və təhlükəsiz rabitə axtaran gəmi sahibləri üçün əməliyyatları xeyli sadələşdirir.
