DNV: Alternativ yanacaqlı gəmilərin sifarişi zəifləyib
DNV-nin "Alternative Fuels Insight" (AFI) platformasının son məlumatlarına görə, 2026-cı ilin fevral ayında alternativ yanacaqla işləyən cəmi 17 yeni gəmi sifarişi qeydə alınıb. Bu sifarişlərin demək olar ki, hamısı (14 gəmi) konteyner daşıma seqmenti tərəfindən sifariş edilən LNG mühərrikli gəmilərin payına düşüb. Qalan üç sifariş isə ikiyanacaqlı etan daşıyan gəmilər olub.
“Seanews.az” xəbər verir ki, cari ilin ilk iki ayında cəmi 37 alternativ yanacaqlı gəmi sifariş edilib ki, bu da 2025-ci ilin eyni dövrü (54 gəmi) ilə müqayisədə ciddi azalma deməkdir. Bununla belə, fevral ayında iki ədəd LNG bunker gəmisi üçün də sifariş verilib. Bu, LNG ilə işləyən donanmanın böyüməsinə paralel olaraq, infrastrukturun genişlənməsindən xəbər verir.
“DNV Maritime”ın dekarbonizasiya direktoru Ceyson Stefanatos bildirib ki, yeni sifarişlərdə LNG-nin hələ də üstünlük təşkil etməsi konteyner operatorlarının yük sahiblərinin ekoloji tələblərinə uyğunlaşmaq istəyi ilə bağlıdır.
