ADDA və GIZ rəqəmsal əməkdaşlıq imkanlarını müzakirə edib
Azərbaycan Dövlət Dəniz Akademiyasında (ADDA) Almaniya Beynəlxalq Əməkdaşlıq Cəmiyyətinin (GIZ) nümayəndələri ilə görüş keçirilib.
ADDA-nın rektoru vəzifəsini icra edən Eldar Qocayev ilə GIZ-in yerli nümayəndəsi və insan resursları üzrə direktoru Mehriban Amirova, həmçinin rəqəmsallaşma üzrə layihə rəhbəri Bahar Arabova arasında keçirilən görüşdə yeni əməkdaşlıq istiqamətləri, xüsusilə rəqəmsal təhsil və idarəetmə sahələrində innovativ yanaşmaların tətbiqi imkanları müzakirə olunub.
Eldar Qocayev ADDA-da tədris və idarəetmə proseslərinin rəqəmsallaşdırılmasını nəzərdə tutan strateji hədəflər barədə məlumat verib. Həmçinin qonaqlara AZCON Holding şirkətlərindən olan ASCO-nun əsas kadr potensialını formalaşdıran təhsil müəssisəsinin imkanları təqdim olunub.
Görüşdə rəqəmsal tədris platformalarının təkmilləşdirilməsi, texnoloji həllərin tətbiqi, eləcə də idarəetmənin innovasiyalaşdırılmasına dair fikir mübadiləsi aparılıb. Tərəflər qeyd edilən istiqamətlər üzrə növbəti addımların müəyyənləşdirilməsi barədə razılığa gəliblər.
Görüşdən sonra qonaqlar ADDA-nın tədris və texniki infrastrukturu ilə tanış olub və mövcud imkanların planlaşdırılan layihələr üçün geniş imkanlar yaratdığını bildiriblər.
