ADDA -da Ümummilli lider Heydər Əliyevə həsr edilmiş elmi-texniki konfrans keçirilib
ASCO-nun Azərbaycan Dövlət Dəniz Akademiyasında (ADDA) Ümummilli lider Heydər Əliyevin anadan olmasının 102-ci ildönümünə həsr edilmiş “Dəniz nəqliyyatının inkişaf prespektivləri” mövzusunda tələbə, magistr və gənc tədqiqatçıların elmi-texniki konfransı keçirilib.
3-4 aprel tarixlərində baş tutan konfransın açılış mərasimi Azərbaycan Respublikasının Dövlət Himninin səsləndirilməsi ilə başlayıb.
Daha sonra ADDA-nın elmi işlər və beynəlxalq əlaqələr üzrə prorektoru Vüqar Sadıqov iştirakçıları salamlayaraq, konfransın Ulu Öndər Heydər Əliyevə həsr edilməsinin təsadüfi olmadığını vurğulayıb. O bildirib ki, Ümummilli liderin sayəsində Azərbaycan gəmiçiliyi qorunub-saxlanılıb və inkişaf etdirilib. Bundan başqa, dahi şəxsiyyət Heydər Əliyev hakimiyyətdə olduğu bütün dövrlərdə elm və təhsilin inkişafını xüsusi diqqətdə saxlayaraq, cəmiyyətin bütün sahələrində yüksəkixtisaslı kadrların yetişdirilməsinə nail olub. Vüqar Sadıqov qeyd edib ki, bu gün də Ümummilli Liderin müdrik siyasətinin layiqli davamçısı olan Prezident İlham Əliyev tərəfindən ölkəmizdə elmin inkişafına böyük diqqət və qayğı göstərilir.
Prorektor çıxışında konfransda müzakirə ediləcək mövzuların gənclərin tədqiqat işlərinə daha ciddi cəlb edilməsi baxımından faydalı olacağını da vurğulayıb.
Tələbə elmi cəmiyyətinin Elmi rəhbəri professor Vaqif Həsənov Tələbə elmi cəmiyyəti ilə koordinasiya olunmuş formada yaradılmış tələbə dərnəklərinin üzvlərinin fəaliyyətindən danışıb. O, tələbələrin elmi-tədqiqat işlərinə cəlb edilməsinin, ADDA və ölkəmizin digər ali təhsil müəssisələrində keçirilən ənənəvi tələbə elmi-texniki konfranslarda onların məruzələrlə çıxışlarının əhəmiyyətini vurğulayıb.
Daha sonra konfransın proqramına uyğun plenar iclasda ADDA PHŞ-nin Elmi-tədqiqat və beynəlxalq əlaqələr şöbəsinin müdiri professor Nəsir Hüseynov çıxış edib. O, Ümummilli liderimizin həyat və fəaliyyətinin araşdırılması, öyrənilməsi və təbliğinin gələcək nəsillərə çatdırılması baxımından vacibliyini qeyd edib.
Açılış mərasimindən sonra beynəlxalq konfransın işi bölmələrdə davam etdirilib. Bölmə iclaslarında ADDA-nın və ölkənin bir sıra ali məktəblərinin nümayəndələri müxtəlif mövzular üzrə məruzələrlə çıxış edib, mövzular ətrafında geniş müzakirələr aparıblar.
Qeyd edək ki, bu dəfəki elmi-texniki konfransa ümumilikdə 7 bölmə üzrə 145 məruzə təqdim edilib. Ən yaxşı məruzə materialları “Tezislər toplusu”nda çap olunacaq.
