Gəmi mexaniki: "Dəniz intizamlı olmağı və çətinliklərə dözməyi öyrədir"
"Heyətlə tanışlıq" rubrikası çərçivəsində növbəti müsahibimiz 2022-ci ildə ASCO-da keçirilən müsabiqədə “Ən gənc dənizçi” nominasiyasının qaliblərindən biri, RoPax tipli “Azərbaycan” gəmi-bərəsinin ikinci mexaniki Sahib Sultanlıdır.
Sahib Niyaz oğlu Sultanlı 1997-ci avqustun 9-da Zaqatalada dünyaya göz açıb. Zaqatala şəhərindəki Zəfər Murtuzəliyev adına tam bir saylı məktəbi əla qiymətlərlə bitirib. 2015-2019-cu illərdə Azərbaycan Dövlət Dəniz Akademiyasında “Gəmi energetik qurğularının istismarı” ixtisasına yiyələnib. Fərqlənmə diplomu ilə bitirdiyi akademiyada oxuduğu illərdə ASCO-nun əlaçı tələbələr üçün əlavə təqaüdünü alıb. Yaxşı oxumaqla yanaşı, təhsil ocağının ictimai həyatında da fəal iştirak edib. Tələbə Gənclər Təşkilatının Gəmi mexanikası fakültəsi üzrə rəhbəri, Yataqxana tələbə şurasının sədri kimi də vəzifəsini layiqincə yerinə yetirib.
- Sahib, yəqin ki, sizi dənizçiliyə təsadüf gətirməyib...
- Uşaqlıqdan dənizçi olmağı arzulayırdım və bu arzumu gerçəkləşdirmək üçün 2015-ci ildə Azərbaycan Dövlət Dəniz Akademiyasına daxil oldum. Etiraf edim ki, oxumaq istəyən tələbələr üçün akademiyada hər cür şərait var.
- Dənizdə ilk səfərlərinizi necə xatırlayırsınız?
-Hərbi xidmətdən qayıtdıqdan sonra ASCO-nun Dəniz Nəqliyyatı Donanmasında işə başladım. ”Ağdam” gəmi bərəsində motorçu kimi ilk səfərə çıxdım. Hər şey ürəyimcə oldu: gəmi də, heyət də, bəxtimdən hava da... Sonra “Qarabağ”, “Laçın” gəmilərində növbə mexaniki kimi çalışdım. Azərbaycanımızın üçrəngli bayrağı dalğalanan gəmilərlə Kerç, Bosfor, Dardanel... boğazlarını keçəndə keçirdiyim fəxr hissini sözlə ifadə etmək asan deyil. Hazırda “Azərbaycan” gəmisinin ikinci mexaniki kimi çalışıram.
- Yaxşı gəmi mexaniki hansı xüsusiyyətlərə malik olmalıdır?
- Baş mühərriklər gəminin ürəyi sayılır. Nasaz “ürəklə” isə dənizdə çox uzağa getmək olmaz. Uğurlu səfərlər baş və köməkçi mühərriklərə, mexanizmlərə texniki xidmətdən birbaşa asılıdır. Yaxşı mexanik cavabdeh olduğu işin məsuliyyətini dərk etməli, mexanizmlərin dilini bilmək üçün daim öz üzərində çalışmalı, müasir texnologiyalardan baş çıxarmalı, tabeliyindəkilərlə ünsiyyət qurmağı bacarmalıdır.
- Gəmidə boş vaxtınızı necə keçirirsiniz?
- Növbədən çıxdıqdan sonra sənədləşmə işləri görürəm. İxtisasıma aid kitabları mütaliə edir, ingilis dilinin incəliklərinə yiyələnməyə çalışıram.
-Dənizçi həyatı sizə nə öyrədib?
- Məsuliyyətli və ayıq-sayıq olmağı, vaxtında və düzgün qərarlar qəbul etməyi, çətinlikdən qorxmamağı...
- Dəniz insanı çox dəyişir?
- Xasiyyət və xarakterimin formalaşmasında rol oynayıb. Dəniz intizamlı olmağı və çətinliklərə dözməyi öyrədir.
- Dənizdə ən çox nə üçün darıxırsınız?
- Təbii ki, dilimizə gətirməsək də ailəmiz, sevdiklərimiz üçün darıxırıq.
- Gəmidə çətin anlarda sizi motivasiya edən nədir?
- Dənizi seyr etmək insana rahatlıq gətirir.
- Dənizdə dostluq və komanda ruhu qurudakından fərqlənir?
- Hər an dənizin üzü dönə bilir. Dənizin şıltaqlığına yalnız birgə - bütün heyətlə qalib gəlmək olur. Heyətə güvənmirsənsə və ya sənə güvənmirlərsə, heç dənizə çıxma. Hər bir dənizçi gəmidə təkcə öz həyatı üçün deyil, həm də başqalarının həyatı üçün də cavabdeh olduğunu unutmur.
- Dənizçiliyə yeni başlayanlara və ya dənizçi olmaq istəyənlərə sözünüz?
- Dənizin cəsurları sevdiyini yəqin eşidiblər. Bu, həqiqətən də belədir. Çətinlikdən qorxmasınlar. Bundan başqa, ixtisaslarına dərindən yiyələnsinlər. Xarici dilləri mükəmməl öyrəsinlər. Unutmasınlar ki, yarımçıq şeylər dənizdə heç nəyə yaramır.
