Benefisiarların “Suraxanı” gəmi-muzeyinə ekskursiyası təşkil edilib
DOST İnklüziv İnkişaf və Yaradıcılıq Mərkəzində təlim alan şəhid ailəsi üzvləri, əlilliyi olan uşaq və yeniyetmələr daxil olmaqla ümumilikdə 20 nəfərədək benefisiar üçün "Azərbaycan Xəzər Dəniz Gəmiçiliyi" QSC-nin (ASCO) "Suraxanı" gəmi-muzeyinə ekskursiya təşkil olunub.
Ekskursiya iştirakçıları ölkəmizdə qədim tarixə malik dənizçilik ənənələri və gəmiçiliyin inkişafı ilə bağlı nadir eksponatlarla tanış olublar. Unikal quruluşa malik tanker-muzeydə Xəzərin tarixi, Abşeronda neft hasilatı, müxtəlif gəmi modellərinə dair məlumatlar benefisiarların marağına səbəb olub.
Ekskursiya qrupunun üzvləri əyləncə xarakterli müxtəlif interaktiv oyunlarda iştirak edərək, dənizçilərin həyat tərzi və gəmiçilik işinə dair bilgilər qazanıb.
Sonda iştirakçılara muzey eksponatları əsasında ASCO tərəfindən nəşr olunmuş “Dənizçilik əlifbası” kitabı hədiyyə edilib.
