n Musk suyla dolu mağarada qalan uşaqların xilasedilməsi üçün xüsusi dənizaltı hazırla
Taylandda iki həftə öncə suyun səviyyəsinin yüksəlməsi səbəbindən girdikləri mağarada qalan futbol komandasının üzvlərinin və məşqçilərinin axtarış işləri davam edir. Məlumata görə, onlardan 8-i artıq xilas olunub. Daha dörd nəfər hələ də mağaradadır. Dünən isə SpaceX və Teslanın yaradıcısı Elon Musk 12 futbolçunun və onların məşqçilərinin xilası üçün mağaranı ziyarət edib. Musk şəxsi Twitter hesabında xilasetmə işlərinin getdiyi mağaradan fotolar paylaşıb. O, SpaceX mühəndislərinin uşaqların suyla dolu keçid və qalareyalardan təhlükəsiz çıxarılması üçün hazırladığı dənizaltını aidiyyatı şəxslərə təhvil verdiyini qeyd edib. Sözügedən dənizaltı dar keçidlərdə manevr etmək imkanına malikdir. Elon Muskun sözlərinə görə, mini dənizaltı raket parçalarından hazırlanıb. Ona uşaqların komandasının şərəfinə Wild Boar adı verilib. Qeyd edək ki, 11-16 yaşına qədər olan 12 uşaq və 25 yaşındakı məşqçi 23 iyunda “Tham Luang Nang Non” mağarasına səfər ediblər. Səfər zamanı mağaranın girişi gözlənilmədən suyla dolub və uşaqlar oradan çıxa bilməyiblər.
