Sənayedə bir ilk: Metan qazının kənarlaşdırılması texnologiyası dənizdə tətbiq olunur
"Lomar" şirkətinin nəzarətində olan "Supramax" tipli quru yük gəmisi (bulk carrier) dənizçilik sektorunda metan qazının kənarlaşdırılması texnologiyasının dünyada ilk dəniz sınaqlarına ev sahibliyi etməyə hazırlaşır. Bu layihə emissiyaların azaldılmasından istixana qazlarının birbaşa məhv edilməsinə doğru keçidi simvolizə edir.
“Seanews.az” xəbər verir ki, "Bennu Climate" və "lomarlabs" tərəfindən idarə olunan 12 aylıq sınaq müddətində gəminin normal fəaliyyəti zamanı metanı yox etmək üçün nəzərdə tutulmuş yığcam bort cihazı yoxlanılacaq. Fotokimya üsulundan istifadə edən sistem gəminin istismarına təsir etmədən həm ətraf havadakı sızıntı metanı, həm də LNG (mayeləşdirilmiş təbii qaz) mühərriklərindən ayrılan metan qalıqlarını (methane slip) hədəf alır.
Gəmiçilik sektoru indiyədək əsas diqqəti karbon emissiyalarına yönəltsə də, qısa müddətli perspektivdə daha güclü istixana effekti yaradan metan qazı, xüsusilə LNG-dən istifadənin artması ilə, həm qanunvericilik tələbləri, həm də kommersiya riskləri baxımından artıq kritik bir məsələyə çevrilir.
2025-ci ildən etibarən gəmi sahibləri "FuelEU Maritime" və "EU MRV" qaydalarına əsasən metan emissiyaları barədə hesabat verməli, 2026-cı ildən isə metan emissiyaları Aİ-nin Emissiya Ticarət Sisteminə (EU ETS) daxil edilməlidir.
