İraq BƏƏ-dən yola düşən gəmi ilə 50 ildən sonra kommersiya gəmiçiliyini bərpa edib
İraqa məxsus “Basrah” yük gəmisi oktyabrın 21-də Birləşmiş Ərəb Əmirliklərinin (BƏƏ) Cəbəl Əli limanından Fars körfəzi istiqamətində yola düşüb. Bu hadisə İraqın 50 ildən artıq fasilədən sonra kommersiya gəmiçiliyini bərpa etmək səylərinin mühüm mərhələsi hesab olunur.
“Seanews.az” xəbər verir ki, 2014-cü ildə inşa edilən “Basrah” gəmisinin dedveyti 17 787 ton, uzunluğu isə 143 metrdir. Gəmi təxminən 900 TEU konteyner daşımaq üçün təchiz olunub və İordaniya bayrağı altında üzür. Xidmətin Küveytlə yanaşı, İraqın cənubundakı Ümm-Qəsr limanını da əhatə edəcəyi bildirilir.
Regionda müharibə səbəbindən təchizat zəncirlərində yaranan çətinliklər fonunda yüklərin böyük hissəsi hazırda quru yolu ilə daşınır. Apreldə “Basrah” gəmisinin Ümm-Qəsr limanına ərzaq yükü çatdırdığı da bildirilmişdi.
İraq rəsmiləri kommersiya gəmiçiliyinin bərpasını milli daşıyıcıların fəaliyyətinin yenidən canlandırılması və ölkənin dəniz nəqliyyatı sektorunun inkişafı baxımından mühüm addım kimi qiymətləndirirlər.
