Limanlar üçün kabel idarəetmə həlləri təkmilləşdirilir
"Cavotec" şirkəti "RoRo" və "RoPax" tipli gəmilərin sahil elektrik enerjisinə qoşulmasını sadələşdirən və limanlarda zərərli tullantıları azaldan yeni nəsil "PowerMove RoRo NxG" mobil kabel idarəetmə sistemini təqdim edib.
“Seanews.az” xəbər verir ki, dünyanın 30-dan çox limanında tətbiq edilən "PowerMove" texnologiyasının bu yeni versiyası təkmilləşdirilmiş mexaniki və rəqəmsal arxitekturası sayəsində daha çevik istifadə və aşağı istismar xərcləri vəd edir.
Sistem geniş paylayıcı həndəsəyə və gücləndirilmiş teleskopik oxa (boom) malikdir ki, bu da ona müxtəlif konstruksiyalı gəmilərin qoşulma lyuklarına dəqiq və sürətli yaxınlaşma imkanı verir. Yenilənmiş dizayn əməliyyat sayını azaldaraq gəmilərin şəbəkəyə qoşulma dövrünü sürətləndirir. Cəmi bir operator tərəfindən uzaqdan idarə olunan sistem real vaxt rejimində status izləmə və nasazlıqların aradan qaldırılması funksiyaları ilə təchiz edilib.
"Cavotec" rəsmilərinin bildirdiyinə görə, bu yenilik limanların dekarbonizasiya hədəflərinə çatmasını asanlaşdırır və iş prosesini daha intuitiv edir. Standartlaşdırılmış strukturu sayəsində ehtiyat hissələrinin tapılmasını və texniki xidməti sadələşdirən sistemin ilk nümunələri artıq İtaliyanın Portoferrayo limanına çatdırılıb. Yaxın aylarda əlavə dörd limanın da bu sistemlə təchiz edilməsi planlaşdırılır.
