Dənizçilik dünyasının diqqəti "MEPC 84" sessiyasına yönəlib
Gəmiçilik sənayesinin əsas qlobal qurumları gələn həftə keçiriləcək “MEPC 84” sessiyası ərəfəsində bəyanat yayaraq, Beynəlxalq Dəniz Təşkilatının (IMO) istixana qazlarının azaldılması üzrə 2023-cü il strategiyasına sadiqliklərini bir daha təsdiqləyib.
“Seanews.az” xəbər verir ki, dünyanın ticari donanmasını təmsil edən BIMCO, ICS və WSC kimi nəhəng şirkətlər alternativ yanacaqlar və innovativ texnologiyaların tətbiqi üçün milyardlarla dollar yatırsa da, 2025-ci ilin oktyabrında IMO-nun yeni qaydalarının qəbulunun təxirə salınması bu investisiyaları riskə atıb. Həmin vaxt bəzi ölkələr ABŞ-nin rüsum hədələrindən sonra mövqelərini dəyişmişdi.
Bu qeyri-müəyyənliyə baxmayaraq, "Everllence" şirkətinin Cənubi Koreyada ilk ammonyak mühərrikini uğurla sınaqdan keçirməsi kimi texnoloji irəliləyişlər davam edir. Şirkət rəsmiləri bildirirlər ki, 2050-ci ilə qədər "xalis sıfır" hədəfinə çatmaq üçün təkcə yeni gəmilərin inşası kifayət deyil, mövcud gəmilərin mühərriklərinin modernizasiyası mütləqdir. Lakin hüquqi aydınlığın olmaması gəmi sahiblərini bu addımdan çəkindirir.
Vanuatunun iqlim naziri Ralf Regenvanu isə böyük dövlətləri prosesi sabotaj etməkdə ittiham edərək, Sakit okean ölkələrinin geri addım atmayacağını vurğulayıb. Gələn həftəki görüşdə 2030-cu ilə qədər emissiyaların 20-30% azaldılmasını nəzərdə tutan strateji hədəflərə dair konkret qaydaların taleyi müəyyənləşəcək.
