Ekoloji təmiz konteyner daşımalarında ilk birgə pilot layihə həyata keçirilir
Almaniyanın gəmiçilik nəhəngi "Hapag-Lloyd" və logistika lideri "Kuehne+Nagel" tullantı əsaslı dəniz bioyanacaqlarından istifadə etməklə emissiyaların azaldılmasına yönəlmiş ilk birgə dayanıqlı daşıma təşəbbüsünü işə salıb.
"Seanews.az" xəbər verir ki, 2026-cı ilin aprel-dekabr aylarını əhatə edən razılaşma çərçivəsində Şərqi Asiya və Şimali Avropa marşrutu üzrə təxminən 3 300 TEU həcmində yükün daşınması nəzərdə tutulur. Bu pilot layihə sayəsində emissiyaların quyudan pərədək ("well-to-wake") prinsipi ilə təxminən 2 979 ton karbon ekvivalentində azaldılması gözlənilir.
Proqram çərçivəsində RED III standartlarına uyğun, tullantı və qalıq xammallardan istehsal olunmuş 1 000 ton dayanıqlı dəniz yanacağı (SMF) istifadə ediləcək. Bu əməkdaşlıq "Hapag-Lloyd"un "Ship Green" proqramına əsaslanır və bron et və tələb et ("book-and-claim") modelindən yararlanır. Bu sistem müştərilərə yanacağın fiziki olaraq məhz onların yükünü daşıyan gəmidə istifadə edilməsindən asılı olmayaraq, şirkətin donanmasında istifadə olunan bioyanacaq hesabına alınan emissiya qənaətini öz adlarına qeydə almağa imkan verir.
