LNG mühərriklərinin atmosferi çirkləndirməsinin qarşısını alan texnologiya sınaqdan uğurlu çıxıb
Yaponiyanın gəmiçilik nəhəngi "NYK" tərəfdaşları ilə birlikdə mayeləşdirilmiş təbii qaz (LNG) ilə işləyən gəmi mühərriklərində metan sızması problemini həll edəcək yeni katalizator sisteminin sınaqlarına başlayıb.
"Seanews.az" xəbər verir ki, "KEYS Azalea" bunker gəmisi üzərində aparılan ilk dəniz sınaqlarında sistem gözləntiləri aşaraq atmosferə atılan metan tullantılarının 90%-dən çoxunun neytrallaşdırılmasına nail olub.
Metan qazı karbon dioksiddən daha güclü istilik effekti yaratdığı üçün dənizçilik sektorunun dekarbonizasiya hədəflərində əsas maneə hesab olunur. "NYK", "Mitsubishi" və "Daihatsu" şirkətlərinin birgə hazırladığı bu texnologiya yanmamış qazı atmosferə buraxılmadan əvvəl oksidləşdirərək zərərsizləşdirir.
Bir il davam edəcək sınaq müddətində sistemin real istismar şəraitindəki effektivliyi yoxlanılacaq. Quruda aparılan əvvəlki testlərdə 70%-lik nəticə göstərən sistemin dənizdə 90%-i ötməsi gələcəkdə LNG mühərrikli gəmilərin ətraf mühitə təsirini minimuma endirmək istiqamətində inqilabi addım hesab olunur.
