Yük gəmisi Luzon sahillərində saya oturub, neft məhsulu dənizə sızıb
Filippinin Luzon adasının şimal-qərb sahillərində yerləşən İlokos Norte əyaləti yaxınlığında yük gəmisi quruya oturaraq yan yatıb və dənizə neft məhsulu sızdırıb.
“Seanews.az” xəbər verir ki, Filippin Sahil Mühafizəsinin məlumatına görə, çınqıl yükü daşıyan “MSCI 1” gəmisi əlverişsiz hava şəraiti səbəbindən iyunun 8-də qəsdən sahilə oturdulub. Gəmidə olan 15 ekipaj üzvünün hamısı təhlükəsiz şəkildə təxliyə edilib.
Hadisədən sonra gəmidən neft sızdığı müəyyən edilib. Çirklənmənin qarşısını almaq üçün xüsusi maneələr quraşdırılsa da, hava şəraiti onların yerindən tərpənməsinə səbəb olub və sahil xəttinin bir hissəsində neft ləkəsi müşahidə edilib. Hazırda ərazidə təmizləmə işləri aparılır.
İlkin məlumata görə, sızma əsas yanacaq çənlərindən deyil, maşın şöbəsindən qaynaqlanır.
