“ClassNK” Fransa bayrağı altında üzən gəmilərdə yoxlamalar aparmaq səlahiyyəti alıb
Yaponiyanın təsnifat cəmiyyəti “ClassNK” Fransa hökumətindən Fransa bayrağı altında üzən gəmilərdə texniki yoxlamalar aparmaq səlahiyyəti aldığını açıqlayıb.
“Seanews.az” xəbər verir ki, bu səlahiyyətə əsasən, “ClassNK” Fransa hökuməti adından SOLAS, MARPOL və Yük Markaları haqqında Beynəlxalq Konvensiya da daxil olmaqla beynəlxalq tələblərə uyğun olaraq qanunvericiliklə nəzərdə tutulan yoxlamaları həyata keçirə və müvafiq sertifikatlar verə biləcək. Bununla da təşkilat Fransa bayraqlı gəmilər üçün təsnifat, texniki yoxlama və sertifikatlaşdırmanı əhatə edən kompleks xidmətlər təqdim edəcək.
“ClassNK” hazırda dünyanın 100-dən çox ölkə və regionu tərəfindən beynəlxalq konvensiyalar çərçivəsində yoxlamalar aparmaq və sertifikatlar vermək üçün səlahiyyətləndirilib.
Təşkilat bildirib ki, Fransa bayraqlı gəmilərin təhlükəsizliyinin və normativ tələblərə uyğunluğunun təmin edilməsinə töhfə verəcək, eyni zamanda qlobal dənizçilik sənayesinin inkişafına dəstək göstərmək üçün yüksək keyfiyyətli xidmətlər təqdim etməyə davam edəcək.
