LNG daşıyan gəmi ABS-in iki ağıllı texniki xidmət notasiyasını birlikdə alan ilk gəmi olub
“GasLog” şirkəti ABS təsnifat cəmiyyətinin qabaqcıl avadanlıq vəziyyətinin monitorinqi üzrə notasiya siniflərini birlikdə alan ilk LNG daşıma şirkəti olub. Bununla da şirkət ənənəvi planlı təmirdən avadanlığın faktiki texniki vəziyyətinə əsaslanan texniki xidmət modelinə keçid istiqamətində mühüm addım atıb.
“Seanews.az” xəbər verir ki, ABS şirkətin LNG daşıyan gəmilərindən birinə SMART (MHM) – "Ağıllı Avadanlıq Vəziyyətinin Monitorinqi" notasiyasını təqdim edib. Gəmi eyni zamanda PMP (Preventative Maintenance Program – "Profilaktik Texniki Xidmət Proqramı") ilə birlikdə bu notasiyanı alan dünyada ilk qazdaşıyan gəmi olub.
SMART (MHM) notasiyası daimi quraşdırılmış monitorinq sistemləri vasitəsilə mühərrik və digər mexanizmlərin texniki vəziyyətini fasiləsiz izləyən, nasazlıqları erkən mərhələdə aşkarlayan və avadanlığın aşınmasını əvvəlcədən proqnozlaşdırmağa imkan verən gəmilərə verilir.
Layihə Yunanıstanın “Propulsion Analytics” şirkəti ilə birgə hazırlanıb. Rəqəmsal platforma mühərriklərdən toplanan yüksək tezlikli məlumatları, sürtkü yağlarının analizini, vibrasiya monitorinqini və planlı texniki xidmət qeydlərini birləşdirərək vəziyyətə əsaslanan texniki xidmət sistemini formalaşdırır.
