Mərmərə dənizində yük gəmisi ilə toqquşan tankerin 9 heyət üzvü saxlanılıb
Çərşənbə günü Mərmərə dənizində Türkiyəyə məxsus yük gəmisi ilə toqquşan “Alsu” tankerinin 10 heyət üzvündən 9-u saxlanılıb.
“Seanews.az” xəbər verir ki, prokurorluğun məlumatına görə, toqquşmadan əvvəl hər iki gəminin kapitanı radio vasitəsilə əlaqə saxlayıb və keçid marşrutlarını müzakirə edib.
İlkin açıqlamalarda təhlükəsizlik prosedurlarının bir neçə dəfə pozulduğu bildirilir. Belə ki, tankerin körpüsündə təcrübəsiz zabit tək olub, müşahidəçi və sükançı olmayıb, gəmi isə toqquşmanın qarşısını almaq üçün sürətini azaltmayıb və mühərrikləri geriyə çevirməyib. Yük gəmisinin AIS sistemi də işləməyib və gəmi tankerin qarşısında qəfil sağa istiqamət dəyişib. Boş vəziyyətdə hərəkət edən “Alsu” tankeri lövbər salmağa məcbur edilib.
Heyət sorğu-sual olunur və gəmidə saxlanılır.
İlkin araşdırmaya görə, “Tuğberek İmamoğlu” yük gəmisi toqquşmadan təxminən 10 dəqiqə sonra batıb. Gəmidə olan 10 heyət üzvünün hamısı Türkiyə vətəndaşıdır və axtarış-xilasetmə əməliyyatı davam etsə də, hələlik onlardan heç birinin yeri müəyyən edilməyib. Axtarışlara 15 gəmi, 5 helikopter, 2 pilotsuz uçuş aparatı və təyyarə, həmçinin Türkiyə Hərbi Dəniz Qüvvələrinin qüvvələri cəlb olunub.
