Sisternin partlaması Panama kanalı üzərindəki körpünün bağlanmasına səbəb olub
Panama şəhərinin yanğınsöndürmə idarəsinin verdiyi məlumata görə, "Amerikalar körpüsü"nün (Bridge of the Americas) yaxınlığındakı yanacaq anbarında baş verən güclü partlayış nəticəsində bir nəfər həlak olub, bir neçə nəfər isə yaralanıb.
“Seanews.az” xəbər verir ki, hadisə bazar ertəsi günü, körpünün şərq sahilində yerləşən çən parkının yaxınlığında yanacaq dolduran tanker yük avtomobilinin partlaması ilə başlayıb. Partlayış yaxınlıqdakı digər iki yük maşınına da keçərək böyük yanğına səbəb olub. Alov Panama kanalının üzərindən keçən və Balboa limanının logistik axınını daşıyan körpüyə qədər yüksəlib.
Partlayışda bir yük maşını sürücüsü həyatını itirib, üç nəfər yanıq xəsarətləri alıb. Yaralılardan birinin vəziyyəti ağırdır.
Hadisə zamanı körpüdə hərəkət edən bir sərnişin avtobusu və digər nəqliyyat vasitələri alovun içindən keçərək möcüzə nəticəsində xilas olub. Körpü nəqliyyat üçün bağlanıb. Mütəxəssislər hislə örtülmüş dayaq və tirlərin struktur bütövlüyünü yoxlayırlar.
Panama kanalı isə gəmilərin keçidi üçün açıqdır. Çərşənbə axşamı səhər saatlarında ticarət gəmiləri zərər görmüş hissənin altından keçməyə davam edib.
Hadisə xüsusilə ABŞ-nin enerji daşımaları üçün kritik olan bir "dar boğazda" baş verdiyi üçün ciddi nəzarət altındadır.
