IMO bioçirklənmə və plastik tullantılarla bağlı yeni hüquqi mexanizmlər üzərində işi davam etdirir
Beynəlxalq Dəniz Təşkilatının (IMO) Çirklənmənin Qarşısının Alınması və Cavablandırılması üzrə Alt Komitəsinin (PPR 13) London sessiyasında dəniz mühitinin mühafizəsinə dair bir sıra mühüm məsələlər üzrə irəliləyiş əldə olunub.
“Seanews.az” xəbər verir ki, sessiyada gəmi gövdələrinin bioçirklənməsinin (biofouling) idarə olunması ilə bağlı gələcək məcburi hüquqi çərçivənin əsas elementləri razılaşdırılıb. Bu çərçivənin ayrıca hüquqi sənəd formasında hazırlanması tövsiyə edilib və məsələ üzrə yekun qərarın 2026-cı ilin aprelində keçiriləcək Dəniz Ətraf Mühitinin Mühafizəsi Komitəsinin (MEPC 84) sessiyasında təsdiqlənməsi gözlənilir.
Alt Komitə həmçinin gəmilərdən dənizə plastik tullantıların atılmasının qarşısının alınmasına yönəlmiş 2026-cı il Strategiyası və Fəaliyyət Planının layihəsini razılaşdırıb. Sənəd MEPC 84-də qəbul olunduğu təqdirdə qüvvəyə minəcək və 2030-cu ilədək gəmilərdən plastik tullantıların dənizə atılmasının sıfıra endirilməsi hədəfini təsdiqləyəcək.
Sessiyada alternativ yanacaqlarla (hidrogen və ammonyak) işləyən gəmi mühərriklərinin emissiya sınaqlarına dair 2008-ci il NOx Texniki Məcəlləsinə dəyişiklik layihəsi də razılaşdırılıb. Dəyişikliklər aşağı və ya sıfır karbonlu yanacaqlardan istifadə edən mühərriklərin MARPOL-un VI Əlavəsinin tələblərinə uyğun sertifikatlaşdırılması üçün yeni ölçmə prosedurlarını nəzərdə tutur.
Bununla yanaşı, xam neft daşıyan yeni tankerlərdə uçucu üzvi birləşmələrin (VOC) emissiyalarının azaldılması məqsədilə təzyiq-vakuum qurğularının quraşdırılmasını nəzərdə tutan MARPOL-un VI Əlavəsinə dəyişiklik layihəsi hazırlanıb. Sənəd təsdiqləndikdən və qüvvəyə mindikdən sonra tətbiq olunacaq.
Alt Komitə həmçinin plastik qranulların dəniz yolu ilə daşınmasına dair yeni məcəllənin hazırlanmasını tövsiyə edib, balıqçılıq alətlərinin markalanması sistemlərinin təşviqi ilə bağlı dairəvi sənəd layihəsini təsdiqləyib, eləcə də neftli və çirkab suların idarə olunması üzrə MARPOL əlavələrinə dəyişiklikləri prinsip etibarilə razılaşdırıb.
Qeyd edək ki, PPR 13-də razılaşdırılmış sənədlərin əksəriyyəti 2026-cı ilin aprelində keçiriləcək MEPC 84 sessiyasında baxılaraq təsdiq edilməlidir.
