Şiddətli fırtına yük gəmilərini Sinopa sığınmağa məcbur etdi
Qara dənizdə gözlənilən güclü fırtına səbəbindən yük gəmiləri Sinopun təbii limanına sığınıb. Küləyin sürətinin 75 km/saata çatacağı proqnozlaşdırılır ki, bu da dəniz nəqliyyatında ciddi fasilələrə yol açır.
“Seanews.az” xəbər verir ki, Türkiyə Meteorologiya Baş İdarəsinin Qara dəniz üçün verdiyi fırtına xəbərdarlığından sonra açıq dənizdə olan gəmilər Sinopun daxili liman ərazisində lövbər salıb. Bu yer təbii liman xüsusiyyətlərinə malik olduğu üçün əlverişsiz hava şəraitindən qorunmaq istəyən gəmilər üçün əsas sığınacaq yeridir.
Son məlumatlara görə, axşam saatlarından etibarən fırtınanın güclənəcəyi gözlənilir. Qərb və şimal-qərb istiqamətindən əsən küləklər gəmi kapitanlarını marşrutlarını dəyişməyə məcbur edib.
Qara dənizin yeganə təbii limanı olan Sinop hazırda çoxsaylı beynəlxalq yük gəmisini qəbul edir. Küləkdən qorunan cənub hissəsindəki daxili liman nəhəng gəmilərin dayanması ilə bir "gəmi parkına" çevrilib. Balıqçı qayıqları da fırtınanın keçməsini gözləmək üçün limana pənah gətirib.
