Metanolla işləyən gəmilərdə yanğın təhlükəsizliyi boşluğu aradan qaldırılır
"Lloyd’s Register" Fondu dənizçilikdə metanolun təhlükəsiz tətbiqi üçün başladılan yeni MEFISTO layihəsinə 378,000 funt-sterlinq qrant ayırıb. Danimarka Yanğın və Təhlükəsizlik Texnologiyaları İnstitutunun rəhbərlik etdiyi bu layihə "Maersk", "OMT Group" və "Safetytech Accelerator" kimi nəhəng tərəfdaşlarla birgə icra olunacaq.
“Seanews.az” xəbər verir ki, layihənin əsas məqsədi metanolla işləyən gəmilər üçün sınaqdan keçirilmiş təhlükəsizlik alətləri və standartlar hazırlamaqdır.
Metanol gəmiçilikdə karbon emissiyasını azaltsa da, onun yanma xüsusiyyətləri xüsusi risklər yaradır. Belə ki, metanol alovu şəffafdır və adi gözlə çətin seçilir, bu da yanğının vaxtında aşkarlanmasını çətinləşdirir.
MEFISTO real mühərrik otağı şəraitini simulyasiya edərək yeni deteksiya (aşkarlama) və spirtə davamlı yanğınsöndürmə sistemlərini sınaqdan keçirəcək. Toplanan empirik məlumatlar əsasında gəmi dizaynı, heyət təlimləri və tənzimləyici qurumlar üçün praktiki vəsaitlər hazırlanacaq.
Hazırda metanol yanğınları üçün standartlaşdırılmış və təsdiq edilmiş həllərin olmaması gəmi dizaynı xərclərini artırır və rəsmi icazələrin alınmasını ləngidir. "Lloyd’s Register" Fondunun texnologiya direktoru Yan Pşıdatek bildirib ki, bu layihə metanol kimi yeni yanacaqların təhlükəsiz mənimsənilməsini sürətləndirmək üçün lazımi sübutlar bazası yaradacaq.
