Zimbabvedə bərə qəzasında ölənlərin sayı 94-ə çatıb
Zimbabvenin Kariba gölündə baş verən bərə qəzasında ölənlərin sayı 94 nəfərə çatıb. Yerli polis axtarış-xilasetmə əməliyyatlarının davam etdiyini bildirib.
“Seanews.az” xəbər verir ki, avqustun 11-də “Nbuya Nehanda” bərəsi Kariba şəhərindən təxminən 56 kilometr məsafədə yerləşən Çalala kəndinə yola düşüb. Zimbabve hökumətinin məlumatına görə, gəmidə təxminən 180 nəfər olub. Bu isə bərənin 90 sərnişinlik tutumundan iki dəfə çoxdur.
Qəza zamanı ərazidə güclü küləklə bağlı xəbərdarlıq qüvvədə olub. Buna baxmayaraq, ekipaj səfəri davam etdirib. Sərt hava şəraitində bərə aşıb. 77 nəfər xilasedicilər və digər şəxslər tərəfindən xilas edilib axtarış işləri isə davam etdirilir.
Çoxsaylı insan itkisi qəzanı Zimbabvenin tarixində ən ağır nəqliyyat fəlakətinə çevirib. Hökumət hadisənin səbəblərini müəyyənləşdirmək üçün hərtərəfli araşdırmaya başlayıb.
Dövlətə məxsus bərənin itirilməsinin göl ətrafında turizm və dolanışıq məqsədli balıqçılıq fəaliyyətinə təsir edəcəyi bildirilir. Marşrut özəl operatorlar üçün açıq olaraq qalır.
