Atlantik hövzəsində LNG gəmi çatışmazlığı fraxt dərəcələrini kəskin yüksəldib
Qərbi Afrika və ABŞ-də mayeləşdirilmiş təbii qaz (LNG) istehsalının artması, həmçinin Misirdə LNG boşaltmalarının ləngiməsi nəticəsində Atlantik hövzəsində LNG tankerlərinin əlçatanlığı ciddi şəkildə azalıb.
"Seanews.az" xəbər verir ki, bu barədə məlumatı "The Maritime Executive" yayıb.
Gəmi çatışmazlığı fonunda yükdaşıma tarifləri son üç həftədə rekord səviyyədə yüksəlib. Noyabrın 21-də London bazarında Atlantik üzrə LNG fraxtı günlük 170 min ABŞ dolları səviyyəsində təklif olunub. Bu göstərici iki həftə əvvəl qeydə alınan 75 min dollarlıq dərəcə ilə müqayisədə 150 faiz artım deməkdir.
Noyabrın əvvəlində qiymətlər artıq avqust göstəricilərindən təxminən 50 faiz yüksək idi. Hazırkı səviyyələr Atlantik fraxt dərəcələrinin son iki ilin maksimumuna çatdığını göstərir. Sakit okean hövzəsində də artım müşahidə olunur, lakin Atlantiklə müqayisədə daha mülayimdir.
Gəmi çatışmazlığının davam etməsi regionlararası tarif fərqlərinin daha da genişlənməsinə səbəb ola bilər.
Bəzi ABŞ idxalçıları qiymətlərin düşəcəyi ümidi ilə alışlarını təxirə salırlar. Avropada da oxşar taktikanın tətbiq oluna biləcəyi bildirilir. Bu isə qış mövsümü yaxınlaşdıqca LNG təchizatında çatışmazlıq riskini artırır. Riskin böyüməsi xüsusilə Ukraynanın Rusiya qaz ixracını əlavə məhdudlaşdırmasına nail olması halında daha kəskin ola bilər.
