Şahdəniz-2” platformalarının ikinci üst tikililəri dənizdə quraşdırı
“Şahdəniz Mərhələ 2” layihəsi üçün inşa olunan ikinci üst tikililər, yəni Hasilat və Dikborular (HDB) platformasının üst tikililəri dənizə yola salınaraq öz yerinə quraşdırılıb. Bu barədə “Şahdəniz” konsorsiumundan məlumat verilib. Bundan əvvəl isə, iyunun əvvəllərində Yaşayış Blokları və Texnoloji Təchizat (YBTT) platformasının üst tikililəri təhlükəsiz qaydada və müvəffəqiyyətlə dənizə yola salınaraq öz yerinə quraşdırılmışdı. Tikintisi qrafiki qabaqlayaraq başa çatdırılmış HDB platformasının üst tikililəri sentyabrın 15-də Bibiheybətdəki “Azfen” tikinti-quraşdırma sahəsindən Xəzər dənizindəki “Şahdəniz” Kontrakt sahəsinə yola salınıb. Bundan əvvəl, üst tikililər avqustun 6-da tikinti-quraşdırma sahəsinin yanalma körpüsündəki yükləmə çərçivəsinə qaldırılıb və sentyabrın 9-da isə dənizə yola salınmağa hazırlıq məqsədilə STB-1 daşıma barjına yüklənib. Üst tikililərinin vahid bir konstruksiya kimi daşınması, sürüşdürmə üsulu ilə dayaq blokunun üzərinə yerləşdirilməsi, montajı və quraşdırılması işləri diqqətlə planlaşdırılıb və 6 gün ərzində tamamlanıb. Üst tikililər suyun 94 metr dərinliyində artıq öz yerində olan HDB dayaq blokunun üzərinə quraşdırılıb. HDB platformasının üst tikililərinin çəkisi təxminən 15 min 800 ton təşkil edir və onun uzunluğu 100 metr, eni isə 60 metrdir. Bu konstruksiya 133 metr uzunluğunda olan məşəl oxundan, 10 axın xətti qəbuletmə qurğusundan, beş hasilat separatorundan, iki buxarlanan qazlar kompressorundan və üç hasilatın ixracı xəttindən ibarətdir. “AMEK-Tekfen-Azfen” (ATA) konsorsiumu tərəfindən inşa edilmiş HDB platformasının üst tikililəri “Azfen” tikinti-quraşdırma sahəsində yerli infrastrukturdan və obyektlərdən istifadə etməklə bütövlüklə ölkə daxilində tikilib. Bu konstruksiyanın tikinti işlərinə subpodratçılar və ixtisaslaşmış təchizatçılar da daxil olmaqla 5000 nəfərdən çox insan cəlb edilib və bu işçi qüvvəsinin təxminən 90 faizi Azərbaycan vətəndaşları olub. BP-nin layihələr üzrə vitse-prezidenti Yuan Dramond deyib:“HDB platformasının üst tikililərinin dənizə yola salınması və dənizdə təhlükəsiz şəkildə quraşdırılması layihə üçün çox mühüm mərhələdir, belə ki, bununla dəniz qurğularının hazırlanması işləri başa çatır. Biz nəhəng “Şahdəniz Mərhələ 2” layihəsinin tamamlanmasına və növbəti ildə ilk qazın çatdırılmasına dəstək olmaq üçün dənizdə yekun quraşdırma işlərinin təhlükəsiz şəkildə və vaxtında yerinə yetirilməsindən məmnunluq duyuruq. Məmnuniyyətlə qeyd etməliyəm ki, layihə qrafikə tam uyğun şəkildə və planlaşdırılmış büdcədən az məsrəflə irəliləyir. Bu mərhələyə əməyin təhlükəsizliyi üzrə yüksək göstəricilərlə çatmaq üçün öz zəhmətini əsirgəməmiş hər kəsə təşəkkürümü bildirmək istəyirəm”. Azərtac
