Amerika Gəmiçilik Bürosunun nümayəndəsi: "ASCO ilə tərəfdaş olmaqdan və onlarla işləməkdən şadıq" - VİDEO
COP29-da iştirak üçün Bakıda olan nüfuzlu təsnifat cəmiyyətlərindən hesab edilən Amerika Gəmiçilik Bürosunun (ABS) Avropa bölməsinin Biznesin inkişafı üzrə vitse-prezidenti Ezekial Davis ASCO-nun fəaliyyəti, eləcə də ASCO və ABS arasındakı əməkdaşlıq münasibətlərinə dair fikirlərini bölüşüb.
O bildirib ki, ASCO sabit və güclü irəliləyiş yolundadır: "Onlar öz donanmalarını yeniləmək və mövcud gəmilərini səmərəli və düzgün şəkildə idarə etmək üzərində çalışırlar. İlk növbədə, ASCO ilə tərəfdaş olmaqdan və onlarla işləməkdən şadıq. Onlar çox irəlini görən bir şirkətdir və biz onların yanında olmaqdan məmnunuq."
Ezekial Davis birgə əməkdaşlıqdan danışarkən hibrid mühərrikli gəminin tikintisi üzrə layihəni xüsusi vurğulayıb: "Hazırda ASCO ilə ən böyük layihələrimizdən biri yeni tikinti işləridir, xüsusilə də hibrid gəmiləri ilə bağlı işlərimizdir. Biz bu layihəni və sənayemizə tətbiq olunan qaydaların davamlı inkişafını böyük həyəcanla izləyirik. Düşünürəm ki, bu, sənaye üçün çox vacibdir. Hazırda gəmiçilik sənayesi üçün əhəmiyyətli bir mərhələdəyik, çünki qlobal emissiya tələblərinin həyata keçirilməsinə ciddi ehtiyac duyulur."
