“Davie” şirkəti Finlandiya gəmiqayırma zavodunu almaq üçün danışıqlara başlayıb
Kanadanın “Davie” gəmiqayırma şirkəti Rusiyaya qarşı sanksiyalardan əziyyət çəkən Finlandiyanın “Helsinki Shipyard Oy” şirkətinin (“HSO”) aktivlərini almaq üçün müstəsna hüququndan istifadə edib.
“Seanews.az”-ın məlumatına görə, “Chantier Davie Canada Inc.” Finlandiya gəmiqayırma zavodunun alınması üçün opsionun həyata keçirilməsi ilə bağlı danışıqlara başlayıb.
“Davie” Kanadanın ən böyük gəmi istehsalçısıdır. Şirkət buzqıranların, hərbi gəmilərin və bərələrin tikintisi üzrə ixtisaslaşıb. “Milli Gəmiqayırma Strategiyası” dövlət proqramı çərçivəsində şirkət müasir Arktika buzqıran gəmiləri və hibrid bərə donanmasının tikintisi üzrə müqavilələrə malikdir.
Şirkətin Helsinki Gəmiqayırma Zavodu (“Helsinki Shipyard Oy”) ilə bağlı planlarını şərh edən “Davie” şirkətinin baş direktoru Ceyms Davies bildirib ki, əgər bu sövdələşmə uğurlu olarsa, “Arktika gəmiqayırmasında dünyanın aparıcı mükəmməllik mərkəzi”nə çevriləcək.
