“Akhisar” gəmisi yanacaq sızıntısına görə saxlanılıb
İspaniya hakimiyyəti Las-Palmas limanında (Qran Kanariya adası) yanacaq doldurarkən 1,8 min litr yanacaq axıntısına görə məsuliyyət daşıyan “Akhisar” (Liberiya bayrağı) gəmisini saxlayıb.
Bu barədə “Canarian Weekly” xəbər verir.
Gəminin limandan çıxmasına 340 min avro təzminat ödəniləndən sonra icazə veriləcək.
Sentyabrın 4-ü axşam saatlarında Las Palmas limanında mazut sızması ilə əlaqədar fövqəladə vəziyyət elan edilib, bundan sonra sahilin təmizlənməsi işlərinə başlanılıb. Kanar adaları hökuməti sentyabrın 8-də açıq suda yanacaq izlərinin görünmədiyini açıqlayıb və sahil boyu çirklənmənin azalması səbəbindən fövqəladə vəziyyəti ləğv edib.
Fövqəladə vəziyyətin aradan qaldırılmasına baxmayaraq, dörd çimərlik - La Restinga, San Borondon, Bocabarranco və Palos - təmizləmə əməliyyatları hələ tamamlanmadığından ziyarətçilər üçün bağlı qalır.
Vəziyyətin monitorinqi bu həftə davam edəcək, fövqəladə hallar xidmətləri adanın cənub və cənub-şərq sahillərində cərəyanlara xüsusi diqqət yetirəcək.
“Seanews.az”
