“Suraxanı” gəmi-muzeyinin ingilis dilində bələdçi kitabı nəşr olunub
"Azərbaycan Xəzər Dəniz Gəmiçiliyi" QSC-nin (ASCO) “Suraxanı” gəmi-muzeyinin ingilis dilində bələdçi kitabı nəşr olunub.
Bu kitab muzeyi ziyarət edən qonaqlara gəmi haqqında daha dolğun məlumat təqdim etmək, muzeyin beynəlxalq səviyyədə tanınmasına, eləcə də turist axınına töhfə vermək məqsədilə tərtib olunub.
Kitabda “Suraxanı” gəmi-muzeyinin bütün zalları, burada sərgilənən eksponatlar, eləcə də gəminin tarixi və texniki xüsusiyyətləri barədə geniş məlumat yer alır. Nəşrdə həmçinin gəminin unikal xüsusiyyətləri, onun bərpası və muzeyə çevrilməsi prosesi ilə bağlı ətraflı məlumat əksini tapıb.
Ziyarətçilər muzeydə olan eksponatlar haqqında maraqlı faktlarla tanış olmaqla yanaşı, kitabda yerləşdirilən fotolar vasitəsilə hər zala daha yaxından nəzər yetirə bilərlər.
Qeyd edək ki, “Suraxanı” gəmi-muzeyi ölkəmizin dənizçilik tarixini əks etdirən unikal məkandır. Gəmi-muzeyin məqsədi yalnız dənizçilik irsimizi nümayiş etdirmək deyil, eyni zamanda gələcək nəsillərə bu irsi çatdırmaqdan ibarətdir.
