Həmkarlar İttifaqı dənizçilərə möhlət hüququ verilməsini xahiş edir
Rusiya Dənizçilərinin Həmkarlar İttifaqı (DHİ) dənizçilərə möhlət hüququ verilməsi ilə bağlı Rusiya Federasiyası Hökumətinin sədri Mixail Mişustinə, Rusiya Federasiyası Müdafiə Nazirliyinə və Rusiya Federasiyası Nəqliyyat Nazirliyinə müraciət edib.
“Seanews.az”ın məlumatına görə, Həmkarlar ittifaqı hesab edir ki, Rusiya Federasiyası Prezidentinin 21 sentyabr 2022-ci il tarixli 647 nömrəli “Rusiya Federasiyasında qismən səfərbərliyin elan edilməsi haqqında” Fərmanının qəbulu ilə əlaqədar olaraq, üzən gəmilərin heyət üzvlərinin təxminən 40%-i Rusiya bayrağı hərbi xidmətə çağırıla bilər.
Rusiya Dənizçilərinin Həmkarlar İttifaqı əmindir ki, bu qədər dənizçini gəmilərdə əvəz etmək praktiki olaraq mümkün deyil. Əgər sıravi bir heyət üzvünün hazırlanması müvafiq kurs və təlimlərdən keçmək üçün xeyli vaxt tələb edirsə, o zaman gəmi heyətlərinin ixtisaslı zabitlərinin hazırlanması təxminən 7-10 il çəkir.
“Rusiya Federasiyasının Ticarət Gəmiçiliyi Məcəlləsinin 53-cü maddəsinə əsasən, hər bir gəminin göyərtəsində müvafiq ixtisasa malik və kifayət qədər sayda dənizçilərdən ibarət heyət olmalıdır, - DHİ-nin sədri Yuri Suxorukov deyir. - Bu, ilk növbədə, gəmi heyətinin minimum tərkibi haqqında Şəhadətnamə ilə təsdiqlənən gəminin naviqasiya təhlükəsizliyi üçün lazımdır. Bu sertifikatın olmaması və ya gəmi heyətinin kəmiyyət tərkibinin göstərilən sertifikatla uyğunsuzluğu gəminin Rusiya və ya xarici limanlarda saxlanması və sonradan onun istismarına qadağa qoyulması üçün əsas ola bilər.
Yuri Suxorukovun fikrincə, səfərbərlik normaları dənizçilərə tam tətbiq olunarsa, ixtisaslı dəniz kadrları çatışmazlığı yaranacaq, heyət üzvlərinin planlı şəkildə dəyişdirilməsi mümkün olmayacaq və minimum heyət tərkibinə əməl edilməməsi nəticə etibarı ilə gəmilərin limanlarda saxlanmasına, daxili və beynəlxalq daşımaların təmin edilməsində çətinliklərə səbəb olacaq.
Qeyd edək ki, hazırda dəniz nəqliyyatı işçilərinin (dənizçilərin) çağırışa möhlət hüququ yoxdur.
