Yaponiyada dənizçilik sahəsində rəqəmsal əkiz texnologiyalarını əhatə edən yeni laboratoriya açılıb
Yaponiyanın Osaka Universitetində "İnkişaf Etmiş Dəniz Sistemlərinin Açıq Əməkdaşlıq Laboratoriyası" (OCEANS) yaradılıb.
Layihə universitetlə yanaşı, Imabari Shipbuilding, Japan Marine United Corporation, ClassNK və MTI şirkətlərinin birgə əməkdaşlığı çərçivəsində reallaşdırılıb.
Laboratoriyanın əsas məqsədi gəmiqayırma və gəmi istismarı sahəsində qabaqcıl texnologiyaların tətbiqi, o cümlədən rəqəmsal əkiz modellərinin yaradılması, süni intellekt və dizayn avtomatlaşdırılması üzrə elmi tədqiqatların aparılmasıdır.
Tədqiqat istiqamətləri aşağıdakılardır:
gəmi dizaynında süni intellekt tətbiqləri,
istehsalat proseslərinin rəqəmsallaşdırılması və avtomatlaşdırılması,
təchizat zəncirinin dayanıqlılığı,
gəmi istismarında rəqəmsal əkiz texnologiyalarının tətbiqi,
texniki xidmətin proqnozlaşdırılması.
Laboratoriyada həm tam, həm də yarımştat elmi heyətlə yanaşı, sənaye mütəxəssisləri və dəvətli tədqiqatçılar da fəaliyyət göstərir. Gənc mühəndislər üçün praktiki yönümlü təlim proqramları da nəzərdə tutulur.
Laboratoriya 2025-ci ilin aprel ayından etibarən fəaliyyətə başlayıb və Yaponiya gəmiçiliyində elmi-texnoloji tərəqqiyə töhfə verməyi hədəfləyir.
