Bu gün uzaq səfərlər kapitanı Məmməd Əli oğlu Məmmədov 85 illik yubileyini qeyd edir
Məmməd Məmmədov 8 yanvar 1940-cı ildə Qərbi Azərbaycanda doğulub. Əvvəlcə Odessa Ali Dənizçilik Məktəbində, daha sonra isə Bakı Dəniz Yolları Məktəbində təhsil alıb.
O, əmək fəaliyyətinə 1966-cı ildə Azərbaycan Xəzər Dəniz Gəmiçiliyində matros olaraq başlayıb, daha sonra kapitan kimi Gəmiçiliyin həm Xəzərdə, həm də Xəzərdənkənar sularda üzən müxtəlif tip gəmilərində çalışıb. 1995-ci ildən hamiyəçi-kapitan olaraq fəaliyyət göstərən peşəkar dənizçi 2014-cü ildə təqaüdə çıxıb.
Məmməd Məmmədov dəniz nəqliyyatının inkişafı ilə yanaşı, bir çox dənizçinin yetişdirilməsinə də mühüm töhfələr verib.
Həmkarları arasında peşəkar dənizçi və səmimi insan kimi ad-san qazanan Məmməd Məmmədovun xidmətləri dəfələrlə yüksək ali mükafatlara layiq görülüb. O, Prezident İlham Əliyevin müvafiq sərəncamı ilə 2017-ci ildə Azərbaycan Respublikası Prezidentinin fərdi təqaüdünə layiq görülüb. 2018-ci ildə isə Azərbaycan Xəzər Dəniz Gəmiçiliyinin 160 illik yubileyi münasibətilə və dəniz nəqliyyatının inkişafında xidmətlərinə görə “Gəmiçilik sahəsində xidmətlərə görə” medalı ilə təltif edilib.
85 illik yubileyi münasibətilə qocaman həmkarımızı ASCO rəhbərliyi və kollektivi adından təbrik edir, ona uzun ömür, cansağlığı, firavan həyat arzulayırıq.
