“Dalğa” və “Xəzər”in balaca sakinləri Hərbi Qənimətlər Parkında olublar
25 iyun Dənizçi Günü və 26 iyun Silahlı Qüvvələr Günü münasibəti ilə “Azərbaycan Xəzər Dəniz Gəmiçiliyi” QSC-nin (ASCO) “Dalğa” və “Xəzər” bağçalarının uşaqları Müzəffər Azərbaycan Ordusunun 44 günlük Vətən müharibəsində qazandığı tarixi zəfərin rəmzi olan Hərbi Qənimətlər Parkında olublar.
Ekskursiya ASCO-nun İnsan resurslarının idarəedilməsi departamentinin təşəbbüsü ilə təşkil edilib.
Ziyarət zamanı uşaqlara 2020-ci ilin Vətən müharibəsi haqqında ətraflı məlumat verilib. Onlara müharibə ərzində Ali Baş Komandan İlham Əliyevin rəhbərliyi altında Azərbaycan Ordusunun göstərdiyi şücaət və qəhrəmanlıq haqqında danışılıb.
Balaca ziyarətçilərə bildirilib ki, düşmən erməni ordusu döyüş meydanını qoyub qaçdıqdan sonra onların silah-sursat və döyüş texnikasını şanlı ordumuz qənimət kimi ələ keçirilib. Sonradan həmin qənimətlər açıq havadakı bu muzeydə toplanıb.
Hərbi Qənimətlər Parkı uşaqların böyük marağına səbəb olub. Onlar burada xalqımızın Qarabağ uğrunda apardığı Vətən müharibəsində qazandığı böyük tarixi Qələbə haqqında dolğun məlumat əldə etməklə yanaşı, qürurverici hisslər yaşayıblar.
