Honq Konq rəqəmsal yük izləmə sistemini istifadəyə verir
Honq Konq bu ay çoxmodal rəqəmsal yük izləmə və məlumat mübadiləsi şəbəkəsini istifadəyə verməyə hazırlaşır. Yeni platforma liman icması üçün yüklərin real vaxt rejimində izlənməsini və məlumatların vahid sistem üzərindən paylaşılmasını təmin edəcək.
Seanews.tr.com bu barədə xəbər yayıb. Honq Konq Yükgöndərənlər Şurasının sədri Villi Lin bildirib ki, sistem yükün görünürlüğünü artırmaqla yanaşı, əməliyyat səmərəliliyini də əhəmiyyətli dərəcədə yüksəldəcək. Onun sözlərinə görə, real vaxt məlumatları ticarətin maliyyələşdirilməsini yaxşılaşdıracaq, kredit xərclərini azaldacaq və ödəniş proseslərini sürətləndirəcək.
Rəsmi qiymətləndirmələrə əsasən, platforma illik 406 milyon ABŞ dollarına qədər qənaət təmin edə bilər. Sistem ilkin mərhələdə istifadəçilər üçün pulsuz olacaq.
Hökumət sistemdən təxminən 50 min istifadəçinin yararlanacağını gözləyir. İstifadəçilər sırasında yükgöndərənlər, ekspeditorlar, gömrük brokerləri, daşıyıcılar, aviaşirkətlər və avtomobil yükdaşıma şirkətləri yer alacaq. Bildirilir ki, platforma dəniz, quru və hava daşımaları arasında əlaqəni gücləndirərək gömrük və logistika proseslərinin sürətlənməsinə töhfə verəcək.
Seanews.az
