ASCO aztəminatlı dənizçi ailələrə və veteran dənizçilərə sosial dəstəyi davam etdirir
“Azərbaycan Xəzər Dəniz Gəmiçiliyi” QSC (ASCO) xüsusi diqqət və qayğıya ehtiyacı olan veteran dənizçilərə və aztəminatlı işçilərə maddi və mənəvi dəstək göstərməklə, dövlətin bu istiqamətdə apardığı sosial aksiyalarda fəal iştirakını davam etdirir.
Xeyirxah aksiya çərçivəsində Sosial inkişaf və nəqliyyat şöbəsinin əməkdaşları Bakının müxtəlif ərazilərində yaşayan 100-dən çox veteran və hazırda ASCO-nun müxtəlif strukturlarında çalışan aztəminatlı işçilərə baş çəkib, onlara müxtəlif ərzaq məhsullarından ibarət yardım sovqatı təqdim ediblər. Aksiya zamanı həmçinin ailələrlə yeni növ koronavirus pandemiyasına qarşı qorunmaları və evdə qalmaları barədə profilaktik söhbətlər aparılıb. Ərzaq yardımı alan dənizçilər karantin günlərində onlara göstərilən diqqət və qayğıya görə minnətdarlıqlarını bildiriblər.
Sosial yardımlarla yanaşı, ASCO-nun müvafiq departament və şöbələrinin əməkdaşları karantin rejimi günlərində yaşı 60-dan yuxarı olan, eyni zamanda veteran dənizçilərlə mütəmadi əlaqə saxlayır, onların maddi və mənəvi vəziyyətləri ilə maraqlanırlar.
