Təcrübəli dənizçi Aydın Mahmudov vəfat edib
“Azərbaycan Xəzər Dəniz Gəmiçiliyi” QSC-yə (ASCO) ağır itki üz verib. ASCO-nun Dəniz üzgüçülüyünün təhlükəsizliyi departamentinin rəisi, uzaq səfərlər kapitanı Aydın Mahmudov 4 may 2020-ci ildə ömrünün 65-ci ilində vəfat edib.
Aydın Mahmudov 12 avqust 1955-ci ildə Goranboy rayonu Borsunlu kəndində anadan olub.
O, Odessa Dəniz Donanması Mühəndisləri İnstitutunun gəmi sürücülüyü ixtisasını bitirib. 1978-ci ildən Azərbaycan Xəzər Dəniz Gəmiçiliyi sıralarında çalışıb. Gəmiçilikdə fəaliyyətə matros kimi başlayan Aydın Mahmudov daha sonralar kapitanın III köməkçisi, kapitanın II köməkçisi, kapitanın böyük köməkçisi, kapitan pilləsinədək yüksəlib. 2000-ci ildə Donanmanın təmir planlaşdırma şöbəsinin rəisi, 2007-ci ildə Dəniz üzgüçülüyünün təhlükəsizliyi idarəsinin rəisi, 2014-cü ildən 2020-ci ilədək isə Dəniz üzgüçülüyünün təhlükəsizliyi departamentinin rəisi vəzifəsini yerinə yetirib.
Aydın Mahmudovun əmək xidmətləri dövlət tərəfindən də yüksək qiymətləndirilib, 2012-ci ildə “Tərəqqi” medalı, 2018-ci ildə III dərəcəli “Əmək” ordeni ilə təltif edilib. Təcrübəli dənizçi “Azərbaycan Xəzər Dəniz Gəmiçiliyinin 160 illiyi (1858-2018)” Azərbaycan Respublikasının yubiley medalına da layiq görülüb.
O, əmək fəaliyyəti dövründə qazandığı təcrübəni hər zaman həmkarları ilə, xüsusilə gənc əməkdaşlarla paylaşıb, səmimiyyəti və mehribanlığı, insanlarla işləmək bacarığı ilə kollektivin rəğbətini qazanıb.
Təcrübəli mütəxəssis və təvəzökar insan Aydın Mahmudovun əziz xatirəsi ASCO kollektivinin və onu tanıyan hər kəsin qəlbində daim yaşayacaq.
Allah rəhmət eləsin!
