Köməyə ehtiyacı olan gəmilər üçün sığınacaq yerləri haqqında təlimat yenilənir
Beynəlxalq Dəniz Təşkilatı (IMO) köməyə ehtiyacı olan gəmilər üçün sığınacaq yerləri haqqında təlimatını yeniləyir. Sənədə bir neçə sahilyanı dövlətin aid olduğu halları tənzimləyən bəzi dəqiqləşdirmələr, tövsiyələr və ümumi müddəalar əlavə edilir. Yeni nəşrdə sahilyanı dövlətlər, xilasedicilər, gəmi sahibləri, bayraq dövlətləri və bu və ya digər şəkildə insidentdə iştirak edəcək digər təşkilatlar üçün daha praktik tövsiyələr var.
“Seanews.az”-ın məlumatına görə, yenilənmiş təlimatların 2022-ci ilin noyabrında Dəniz Təhlükəsizliyi Komitəsi tərəfindən təsdiq ediləcəyi, daha sonra isə IMO Assambleyası tərəfindən qəbul ediləcəyi gözlənilir.
Sənəd insanların həyatı üçün birbaşa təhlükə olmadıqda və yalnız gəminin köməyə ehtiyacı olduqda tətbiq ediləcək. Əgər insan həyatının mühafizəsi məsələsi qaldırılırsa, o zaman Dənizdə Axtarış və Xilasetmə üzrə Beynəlxalq Konvensiyanın (SAR Konvensiyası) normaları tətbiq edilir.
Mövcud təlimat 2003-cü ildən qüvvədədir, lakin o vaxtdan bəri müxtəlif mübahisələr, xüsusən də gəminin sahilyanı dövlətin yurisdiksiyasından kənarda qəzaya uğraması və ya onlardan bir neçəsinin iştirak etdiyi zaman yaranıb. Buna görə də, təlimatlarda dəqiqləşdirmələr və tövsiyələr, habelə gəmilər üçün sığınacaq yerlərinin müəyyən edilməsində sahilyanı dövlətlərə kömək edəcək ümumi müddəaların daxil edilməsi qərara alınıb.
Rusiya Dənizçilərin Həmkarlar İttifaqı qeyd edir ki, dövlətlər çox vaxt zədələnmiş gəmiləri öz limanlarına buraxmaqdan çəkinirlər və bu, təhlükəli ola bilər. Məsələn, 2012-ci ilin iyulunda “MSC Flaminia” konteyner gəmisi ilə bağlı insident xatırladılır. İtkin düşmüş hesab edilən bir nəfərdən başqa, bütün heyət üzvləri təxliyyə edildikdən sonra onlar təxminən iki ay ərzində praktiki olaraq yanğın nəticəsində məhv olmuş gəmini Avropanın ərazi sularına aparmağa çalışsalar da, heç bir sahilyanı dövlət ona kömək etməyib. Nəticədə bir müddət sonra onun girişinə yalnız “MSC Flaminia”-nın qeydiyyatdan keçdiyi Almaniya icazə verib.
