“Wallenius Wilhelmsen” 1,5 milyard dollar dəyərində 12 LNG ilə işləyən avtomobil daşıyan gəmi sifariş edib
Norveçin gəmiçilik və logistika şirkəti “Wallenius Wilhelmsen” Çinin “Jinling Shipyard” gəmiqayırma zavodu ilə 4 yeni ikiyanacaqlı avtomobil daşıyan gəminin inşasına dair müqavilə imzalayıb. Müqaviləyə əlavə olaraq daha 8 gəminin sifarişi üçün seçim hüququ da daxildir.
Hər birinin tutumu 9900 avtomobil (CEU) olan gəmilər mayeləşdirilmiş təbii qaz (LNG) və ənənəvi yanacaqla işləyən mühərriklərlə təchiz ediləcək. İlk dörd gəminin təhvilinə 2030-cu ilin ortalarından başlanması planlaşdırılır. Əlavə sifariş hüququndan istifadə edilərsə, daha dörd gəmi 2031-ci ildə, qalan dörd gəmi isə 2032-ci ildə təhvil veriləcək.
Bütün sifarişlərin reallaşdırılması halında layihənin ümumi dəyərinin təxminən 1,5 milyard dollar olacağı gözlənilir.
Osloda yerləşən “Wallenius Wilhelmsen” şirkəti altı qitəni əhatə edən 15 marşrut üzrə təxminən 130 gəmi istismar edir.
