Norveç şirkətinin yeni gəmisi rotor yelkənləri ilə təchiz olunacaq
Norveçin “Klaveness Combination Carriers” (“KCC”) intermodal daşıyıcısının törəmə şirkəti Çinin “Jiangsu New Yangzi Shipbuilding” və “Jiangsu Yangzi Xinfu Shipbuilding” tərsanələri ilə tikilməkdə olan “Cabu III” gəmisini modernləşdirmək üçün müqavilə bağlayıb.
“Seanews.az” “KCC”-nin mətbuat xidmətinə istinadən məlumat verir ki, iş 24 metr hündürlükdə iki “eSAIL®️ rotor" yelkənindən ibarət avtomatlaşdırılmış külək hərəkəti sisteminin quraşdırılmasını nəzərdə tutur.
“Cabu III” qarışıq (toplu və maye) yüklərin daşınması üçün gəmilər seriyasından üçüncü olacaq. İstismara verilməsi 2026-cı ilin üçüncü rübünə planlaşdırılan “Cabu III” yardımçı təkan texnologiyası ilə təchiz ediləcək.
Yelkən sistemi İspaniyanın “Bound4blue” şirkəti tərəfindən hazırlanıb. Yayda 24 metrlik iki rotorlu yelkən quraşdırılacaq. Bu həll Norveçin “DNV” təsnifat cəmiyyətindən tip təsdiqini almışdır. Hər bir yelkən aerodinamik cəhətdən optimallaşdırılmış səth üzərində hava cərəyanlarını çəkmək üçün ventilyator sisteminə malikdir və nəticədə hərəkət səmərəliyi təmin edilir.
“Bound4blue” artıq 2021-ci ildə İspaniyanın iki kiçik gəmisini rotor yelkənləri ilə təchiz edib. 2022-ci ilin mart ayında o, niderlandlı gəmi sahibi “Amasus Shipping” ilə “Eems Traveler” toplu daşıyıcısında 17 metrlik iki yelkən quraşdırmaq üçün müqavilə imzalayıb.
