ADDA və ADK-da qış imtahan sessiyası başlayıb
ASCO-nun Azərbaycan Dövlət Dəniz Akademiyasında (ADDA) və Azərbaycan Dənizçilik Kollecində (ADK) 2024/2025-ci tədris ilinin payız semestrinin imtahan sessiyası başlayıb.
Tələbələr ADDA-da bakalavriat səviyyəsi üzrə “Dəniz naviqasiyası mühəndisliyi”, “Gəmi energetik qurğularının istismarı mühəndisliyi”, “Elektrik və elektronika mühəndisliyi” və “Gəmiqayırma və gəmi təmiri mühəndisliyi” ixtisasları, magistratura səviyyəsi üzrə isə “Gəmiçilik və gəmilərin hərəkətinin idarəedilməsi”, “Dəniz texnikası və texnologiyası mühəndisliyi”, “Gəmi energetik qurğularının istismarı mühəndisliyi” və “Elektrik mühəndisliyi” ixtisasları üzrə imtahanlarda iştirak edirlər.
Burada imtahanlar “Elektron Akademiya” platforması üzərindən test, sistemdaxili yazılı, yazılı və şifahi (əsas ixtisas fənləri) formalarda keçirilir.
ADDA-nın nəzdindəki Azərbaycan Dənizçilik Kollecində isə imtahanlar “Elektron Kollec” platforması üzərindən aparılır. ADK-nın imtahan sessiyasında “Gəmi sürücülüyü”, “Gəmi energetik qurğularının istismarı”, “Elektrik təchizatı” (su nəqliyyatında) və “Gəmilərin təmiri” ixtisasları üzrə tədris qruplarında oxuyan tələbələr iştirak edirlər.
İmtahan sessiyasına ADDA üzrə 1 fevral, ADK üzrə isə 31 yanvar tarixində yekun vurulacaq.
