Gəmiçiliyin veteran işçisi Nuxim Berkoviç Milqrom 91 yaşında vəfat edib
Martın 25-də Azərbaycan Xəzər Dəniz Gəmiçiliyinin veteran işçisi Nuxim Berkoviç Milqrom 91 yaşında vəfat edib.
Çağdaş dövrümüzdə yəqin ki, az sayda insan bir müəssisədə 40–50 il çalışmağı ilə fəxr edə bilər. Bu məsələnin təməlində duran səbəblərin mahiyyətinə varmadan, mübaliğəsiz deyə bilərik: Nuxim Berkoviç ömrünün 60 ilini doğma müəssisəyə həsr edən “az”lardan olub.
Nuxim Berkoviç 1934-cü il iyulun 26-da Ukraynanın Krasilov şəhərində dünyaya göz açıb. Doğulduğu şəhərdə yeddillik məktəbi bitirdikdən sonra Azərbaycana gəlib və 1951-ci ildə Bakı Dənizçilik Məktəbinə daxil olub. 1953-cü ildə istehsalat (üzmə) təcrübəsini keçmək üçün “Kasptanker”in “Molotov” gəmisinə göndərilib, ocaqçı kimi əmək fəaliyyətinə başlayıb. Gənc Nuxim təcrübə mərhələsini uğurla keçib: fərasətli, intizamlı və məsuliyyətli işçini Gəmiçiliyin dəniz nəqliyyatı donanmasında işləmək üçün üzücü heyətə götürüblər.
Bundan sonra N.Milqrom fəaliyyətini “General Həzi Aslanov” tankerində böyük motorçu kimi davam etdirib və daim öz bilik və bacarıqlarını yüksəltməyə çalışıb. Onun bu xüsusiyyəti rəhbərliyin gözündən yayınmayıb: zəhmətsevər gənc 1955-ci ildə Bakıya yenicə gətirilmiş “Sergey Tülenin” tankerinə 1-ci dərəcəli motorçu təyin edilib. Bu tanker Xəzər dənizində ilboyu üzmək üçün nəzərdə tutulmuş ilk dayazoturumlu “Oleq Koşevoy” tipli tankerlərdən üçüncüsü olub.
İşinə həmişə böyük məsuliyyətlə yanaşan Nuxim Berkoviç təcrübə topladıqca ocaqçılıqdan başlanan əmək yolunu motorçu, donkerman, böyük mexanik kimi davam etdirib. Uzun illər ərzində dəniz nəqliyyatının müxtəlif gəmilərində çalışaraq topladığı zəngin təcrübəni gənc mütəxəssislərlə də bölüşüb.
Nuxim Berkoviç 2003-cü ildə Azərbaycan Dövlət Xəzər Dəniz Gəmiçiliyi İdarəsində Donanmanın texniki istismarı xidmətinin İstilik texnikası şöbəsinin rəis müavini vəzifəsinə təyin edilib və bu vəzifədə təqaüdə çıxanadək – 2014-cü il fevralın 24-dək çalışıb.
Qeyd etmək lazımdır ki, Nuxim Berkoviç təkcə öz əməksevərliyi, peşəkarlığı, vəzifə borcuna sadiqliyi ilə deyil, həm də insani keyfiyyətləri ilə kollektivin səmimi hörmətini qazanmışdı.
Ləyaqətli və xeyirxah insan – Nuxim Berkoviç Milqromun xatirəsi onu tanıyanların qəlbində həmişə yaşayacaq.
Sevda Abdullayeva – ASCO-nun İctimaiyyətlə əlaqələr departamentinin aparıcı mütəxəssisi
