Araşdırma: Mikroplastiklər okeanın CO₂ udma qabiliyyətini azalda bilər
Norveç Elm və Texnologiya Universitetinin tədqiqatçıları mikroplastiklərin dəniz ekosistemlərinə təsirini araşdıraraq onların okeanın karbon qazını (CO₂) udma qabiliyyətini azalda biləcəyini müəyyən ediblər.
“Seanews.az” xəbər verir ki, araşdırma barədə yazını jurnalist İngebjörq Hestvik hazırlayıb, əsas elmi izahlar isə NTNU-nun Enerji və Proses Mühəndisliyi Departamentindən tədqiqatçı Françeska Verones tərəfindən verilib.
Alimlər bildirirlər ki, okean Yer kürəsində karbon dövriyyəsində mühüm rol oynayır və insan fəaliyyəti nəticəsində yaranan CO₂-nin təxminən 25–30 faizi dənizlər tərəfindən udulur. Bu prosesdə əsas rol oynayan fitoplankton mikroplastiklərin təsirinə məruz qalır.
Araşdırmaya görə, mikroplastiklər yosunların böyüməsini zəiflədir, suyun günəş işığını daha az keçirməsinə səbəb olur və hüceyrələrdə stress yaradır. Nəticədə fotosintez və karbon udulması zəifləyir.
Tədqiqatın nəticələri göstərir ki, təsir xüsusilə tropik və quraq iqlim zonalarında daha güclüdür. Hazırda ümumi təsir nisbətən məhdud olsa da, okeanda mikroplastiklərin artması gələcəkdə bu problemi daha da dərinləşdirə bilər.
Alimlər vurğulayırlar ki, plastik çirklənmə yalnız ekoloji deyil, həm də iqlim və qlobal karbon balansına təsir edən ciddi problemdir və buna kompleks yanaşma tələb olunur.
