"Hengli Heavy Industry" dörd yeni gəmi sifarişi alıb
Çinin “Hengli Heavy Industry” tərsanəsi yeni gəmi tikintisi üçün dörd müqavilə bağlayıb.
Seanews.az xəbər verir ki, qısa müddət əvvəl 12 ədəd "VLCC" (çox böyük xam neft tankeri) üçün sifarişlər əldə edən Çin gəmiqayırma şirkəti bu dəfə yunan gəmi sahibi "Capital" şirkəti və yerli "Shandong Ocean Shipping" ilə daha dörd gəminin inşası üzrə müqavilələr bağlayıb.
Yeni sifarişlərə bir "VLCC", iki "Capesize" quru yük gəmisi və bir "Post-Panamax" tipli quru yük gəmisi daxildir.
Bu dəfə sifariş edilən "VLCC" modeli "Hengli Heavy Industry" tərəfindən müstəqil şəkildə layihələndirilib. Gəmi əsas qlobal xam neft limanlarında yükləmə və boşaltma avadanlıqları ilə tam uyğunlaşa bilir, həm uzun məsafəli transokean xam neft daşımalarını, həm də iri neft yataqlarından emal zavodlarına böyük həcmli nəqliyyat tələblərini qarşılayır.
Şirkətdən bildirilib ki, 180 min dedveytlik "Capesize" quru yük gəmiləri böyük həcmli daşımalar, yüksək dözümlülük və üstün iqtisadi səmərəliliyi özündə birləşdirir. 95 500 dedveytlik "Post-Panamax" quru yük gəmisi isə "Hengli Heavy Industry"-nin flaqman layihələrindən biri hesab olunur.
