“Noatum Maritime” LNG ilə işləyən ilk “Ro-Ro” tipli gəmini istismara qəbul edib
“Noatum Maritime” BƏƏ-nin “AD Ports Group” şirkətinin Dənizçilik və Gəmiçilik Klasterinin tərkibinə daxil olaraq, ilk LNG (mayeləşdirilmiş təbii qaz) ilə işləyən “Pure Car and Truck Carrier (PCTC)” tipli “Ro-Ro” gəmisini təhvil alıb.
"Seanews.az" xəbər verir ki, yeni gəmi Türkiyənin “Erkport” şirkəti ilə birgə yaradılmış “United Global Ro-Ro” birgə müəssisəsində fəaliyyət göstərəcək.
Yeni gəmi əsasən Yaxın Şərq, Asiya və Aralıq dənizi marşrutlarında istismar olunacaq.
“UGR Al Samha” adlanan gəmi 12 göyərtəyə malikdir, ümumi sahəsi 59 331 kvadratmetr təşkil edir və 7000-dən artıq avtomobil ekvivalenti (CEU) daşımaq gücünə malikdir.
LNG ilə işləyən “PCTC” tipli gəmilər ətraf mühitə təsirin azaldılması, əməliyyat səmərəliliyinin artırılması və texniki xərclərin minimuma endirilməsi baxımından əhəmiyyətli üstünlüklərə malikdir. Bu tip yanacaq hava keyfiyyətinə mənfi təsiri azaltmaqla yanaşı, yanacaq səmərəliliyi və istismar etibarlılığı baxımından da müsbət nəticələr verir.
“AD Ports Group”un Dənizçilik və Gəmiçilik Klasterinin baş direktoru kapitan Ammar Al Şaiba bildirib ki, “UGR Al Samha” gəmisinin donanmaya daxil edilməsi davamlı gəmiçilik və əməliyyat mükəmməlliyi istiqamətində atılmış mühüm addımdır. O qeyd edib ki, təmiz yanacaq texnologiyalarından istifadə ilə biz yalnız karbon izimizi azaltmırıq, həm də qlobal tənzimləyici tələblərə uyğunluğu təmin edərək müştərilərimiz üçün əlavə dəyər yaradırıq. Bu addım gəmiçilik sənayesinin daha yaşıl gələcəyə keçidinə dəstəyimizi gücləndirir.
