Almaniya limanlarının yük dövriyyəsi aşağı düşüb
Almaniya limanlarının yük dövriyyəsi 2023-cü ildə əvvəlki illə müqayisədə 4,1% azalaraq 267,8 milyon ton təşkil edib.
“Seanews.az” xəbər verir ki, bu barədə ölkənin Federal Statistika İdarəsi məlumat yayıb.
Ən yüksək yük dövriyyəsi Hamburq limanında qeydə alınıb (99,6 milyon ton, 2022-ci ilə nisbətən -3,6%). Ondan sonra Bremerhaven (39,2 milyon ton, -8,4%), Vilhelmshaven (29,8 milyon ton, -6,1%), Rostok (23,9 milyon ton, +11,9%) limanları gəlir. Rostok limanının fəaliyyətinə neftin aşırılmasının dörd dəfə artması təsir edib - 2022-ci ildəki 1,3 milyon tondan 2023-cü ildə 5,2 milyon tona qalxıb.
2023-cü ildə Almaniya limanlarının əsas tərəfdaşı 27,9 milyon ton yüklə (+26,9%) ABŞ olub. İkinci yerdə Norveç (25,1 milyon ton, +10,6%) qərarlaşıb. Sonrakı yerdə İsveç (23 milyon ton, -5,9%) və Çin (20,1 milyon ton, -3,8%) gəlir. Statistika idarəsi vurğulayır ki, 2023-cü ildə ABŞ-a gedən yüklərin beşdə ikisi (12,2 milyon ton) qalıq yanacaqlar olub.
Ümumilikdə, ötən il Almaniya limanları digər ölkələrdən 38 milyon ton kömür, neft və təbii qaz qəbul edib (+5,3%). 2023-cü ildə kömür idxalı 35,9% azalaraq 7,3 milyon tona düşüb. Bununla yanaşı, idxal olunan neftin işlənməsi 2022-ci illə müqayisədə 6,2% artaraq 25,9 milyon tona çatıb. Təbii qazın (əsasən mayeləşdirilmiş neft qazı) idxalı 15 dəfə - 2022-ci ildəki 317 min tondan 2023-cü ildə 4,8 milyon tona qədər artıb. Təbii qaz idxalı 3,7 milyon ton təşkil edib.
2023-cü ildə Almaniya limanlarında konteyner dövriyyəsi 8,5% azalaraq 12,7 milyon TEU təşkil edib. Konteyner yüklərinin əsas hissəsi Çindən (2,61 milyon TEU, -12,2%) və ABŞ-dan (1,37 milyon TEU, -3,2%) gəlib.
