“MOL”, “TradeWaltz” və “Suzuki” Hindistan–Afrika avtomobil ticarətini gücləndirmək üçün memorandum imzalayıb
Yaponiyanın “Mitsui O.S.K. Lines, Ltd.” (MOL) şirkəti Tokioda yerləşən “TradeWaltz Inc.” və “Suzuki Motor Corporation” ilə birlikdə Hindistan və Afrika arasında avtomobil ticarətinin inkişafına dair Anlaşma Memorandumu (MoU) imzalayıb.
“Seanews.az” xəbər verir ki, memorandum Yoxohamada keçirilən doqquzuncu Tokio Beynəlxalq Afrika İnkişafı Konfransında (TICAD 9) elan olunub.
Birgə bəyanata əsasən, tərəflər Hindistan–Afrika avtomobil daşımalarında mövcud çətinliklərin müəyyənləşdirilməsi, onların həlli yollarının araşdırılması, o cümlədən rəqəmsallaşdırma və dekarbonizasiya təşəbbüslərinin təşviqi istiqamətində əməkdaşlıq edəcəklər.
“MOL” hazırda tələbatın sürətlə artdığı Afrika ölkələrinə Hindistandan avtomobil daşınma xidmətlərini genişləndirir.
2024-cü ildə “TradeWaltz” Keniya bazarında ticarətin rəqəmsallaşdırılmasına dair araşdırma aparıb. Şirkət 2025-ci ildə isə Hindistanda İqtisadiyyat, Ticarət və Sənaye Nazirliyinin “Global South Fund Master Plan Development Project” proqramı çərçivəsində analoji araşdırma həyata keçirib.
Öz növbəsində, “Suzuki” Afrika ölkələrində insanların mobilliyini Hindistanda istehsal edilən kiçik avtomobillər və digər məhsullar vasitəsilə dəstəkləyir.
Bu əməkdaşlıq Hindistan və Afrika arasında daha dayanıqlı avtomobil təchizat zəncirinin formalaşdırılmasına, eyni zamanda regionların iqtisadi inkişafına töhfə verməyi hədəfləyir.
