Dəniz yolu ilə duz daşımalarında rekord artım: Misir liderliyə yüksəlir
2026-cı ilin əvvəlindən etibarən dünya üzrə dəniz yolu ilə duz daşımaları kəskin artaraq son illərin ən yüksək göstəricisinə çatıb. "Ursa Shipbrokers" agentliyinin "AXSMarine" məlumatlarına əsasən hazırladığı hesabata görə, yanvar və fevral aylarında qlobal miqyasda 13,5 milyon ton duz daşınıb ki, bu da ötən ilin müvafiq dövrü ilə müqayisədə 19% artım deməkdir.
“Seanews.az” xəbər verir ki, bu artımın əsas hərəkətverici qüvvəsi Misir olub. Ölkənin İsgəndəriyyə, Damieta və Port-Səid kimi limanlarından həyata keçirilən ixracat ötən illə müqayisədə iki dəfədən çox artaraq 2,9 milyon tona çatıb. Ənənəvi olaraq bazarın liderləri Avstraliya, Hindistan, Çili və Meksika olsa da, Şimali Afrikadan gələn bu böyük həcm ticarət axınlarını yenidən formalaşdırır.
ABŞ-də yanvar ayında tüğyan edən "Fern" fırtınası buzəritmə məqsədilə duza olan tələbatı artırıb. Nəticədə ABŞ-nin duz idxalı 62% artaraq rekord 4,2 milyon ton təşkil edib.
Ümumiyyətlə, xlor və kaustik soda istehsalında əsas xammal olan duz ticarəti son 10 ildə davamlı böyüyərək 2025-ci ildə rekord 58,4 milyon tona çatıb.
Duz ticarətindəki bu canlanma gəmiçilik sektoruna, xüsusilə "Supramax" (daşımaların 25%-i), "Handysize" (23%) və "Ultramax" (17%) tipli yük gəmilərinə olan tələbatı stimullaşdırıb. Kiçik və orta ölçülü bu gəmilərin ümumi yükləmə həcmi ilin ilk aylarında 8% artıb.
