Qətərin LNG tankeri iyuldan bəri ilk dəfə Hörmüz boğazından keçib
Qətərə məxsus “Al Marrouna” LNG tankeri iyul ayından bəri ilk dəfə Hörmüz boğazından keçərək Oman körfəzinə çatıb.
“Seanews.az” xəbər verir ki, gəmi Qətərdə avqustun əvvəlində LNG yükləyib və çərşənbə axşamı yerli vaxtla Oman körfəzində olub.
“Bloomberg”in gəmi izləmə məlumatlarına görə, tankerin növbəti istiqaməti Pakistanın Qasim limanıdır və onun cümə axşamı limana çatması gözlənilir.
Bu arada, bir neçə boş Qətər LNG tankeri yenidən Fars körfəzinə doğru hərəkətə başlayıb. Bu, Qətərin Hörmüz boğazından LNG ixracını bərpa etməyə hazırlaşdığını göstərə bilər. Lakin müntəzəm ixracın nə vaxt bərpa olunacağı hələ məlum deyil.
Qətər iyulun sonunda tankerlərindən birinə hücumdan sonra LNG-ni bu su yolu ilə ixrac etməyi dayandırmışdı. Ölkə müharibədən əvvəl qlobal LNG ixracının təxminən beşdə birini təmin edirdi.
Qətər LNG hasilatını tam dayandırmayıb və körfəzdə olan boş tankerlərə qaz yükləməyə davam edir. Ölkə avropalı və asiyalı alıcılara LNG tədarükü üzrə fors-major rejimini oktyabr ayınadək uzadıb.
