Süveyşdən keçən konteyner daşımalarının artması tarifləri aşağı salır
“Drewry” Dünya Konteyner İndeksi bu həftə 1 faiz azalaraq 40 futluq konteyner üçün 4 468 dollara düşüb. Asiya–Avropa marşrutlarında tariflərin azalması Transsakit okean marşrutlarındakı artımdan daha çox olub.
“Seanews.az” xəbər verir ki, Asiya-Avropa marşrutlarında Süveyş kanalından keçən konteyner gəmilərinin sayının artması əlavə daşıma gücü yaradıb. Şanxay–Genuya marşrutunda tariflər 5 faiz azalaraq 3 835 dollara, Şanxay–Rotterdam marşrutunda isə 4 faiz enişlə 3 485 dollara düşüb. “Drewry” Süveyşdən keçidlərin həftəlik sayının 41-dən 48-ə yüksəldiyini bildirib.
Çində Qızıl həftə tətili ərəfəsində daşıyıcılar reyslərin ləğvi ilə gücü tənzimləməyə çalışır. Gələn həftə Asiya–Avropa marşrutlarında 7, Transsakit okean istiqamətində isə 15 boş reys planlaşdırılıb.
“Drewry” gələn həftə həm Asiya–Avropa, həm də Transsakit okean marşrutlarında tariflərin daha da enəcəyini gözləyir. Bununla yanaşı, Qırmızı dənizdə təhlükəsizlik riskləri, Panama kanalında məhdud tutum və Avropadakı logistika problemləri bazarda qeyri-müəyyənliyi artırır.
